शिरूर अनंतपाळ : प्रतिनिधी
शिरूर अनंतपाळ तालुक्यातील रापका शिवारात गाव नकाशामध्ये नमूद असलेला वडिलोपार्जित रस्ता शेजारील शेतकऱ्याने अडवल्याचा गंभीर प्रकार समोर आला आहे. यामुळे मधुकर विठ्ठल कांबळे यांची गट क्रमांक ४५ व ४७ मधील शेती गेल्या दोन वर्षांपासून पडीत अवस्थेत असल्याची माहिती मिळाली आहे.
या प्रकरणी संबंधित शेतकऱ्याने शेताच्या धुऱ्यावरून जाणारा रस्ता बंद केल्यामुळे मधुकर कांबळे यांना शेतीपर्यंत पोहोचण्यास अडचणी निर्माण झाल्या आहेत. याबाबत तहसीलदार, शिरूर अनंतपाळ यांनी संबंधित शेतकऱ्याला रस्ता खुला करून देण्याचे आदेश दिले होते. मात्र, या आदेशाची अवहेलना करत अद्यापही रस्ता खुला करण्यात आलेला नाही.
तहसीलदारांच्या आदेशानंतरही कारवाई न झाल्याने संतप्त झालेल्या मधुकर कांबळे यांनी १८ एप्रिल २०२६ पर्यंत रस्ता खुला करून न दिल्यास २० एप्रिल २०२६ पासून उपोषणास बसण्याचा इशारा दिला आहे. तसेच या प्रकरणी मानवी हक्क आयोगाकडे तक्रार दाखल करण्याचाही निर्णय त्यांनी घेतला आहे.
गाव नकाशावरील रस्ता अडविणे हा गंभीर प्रकार असून प्रशासनाने याकडे तातडीने लक्ष देण्याची गरज व्यक्त केली जात आहे. संबंधित शेतकऱ्यावर योग्य ती कारवाई करून रस्ता खुला करून द्यावा, अशी मागणी परिसरातील नागरिकांकडून करण्यात येत आहे.
