फुरसुंगी, पुणे : प्रतिनिधी
फुरसुंगी येथे एका टेम्पो चालकाने भरधाव वेगात दोन ते तीन दुचाकींना धडक देऊन गंभीर अपघात घडविल्याची घटना घडली. संबंधित टेम्पो हा जागृती ट्रान्सपोर्टचा असल्याची माहिती समोर आली असून चालक दारूच्या नशेत असल्याचे स्थानिकांनी सांगितले.
अपघातानंतर चालक घटनास्थळावरून फरार झाला होता. या घटनेमुळे परिसरात नागरिकांमध्ये तीव्र संतापाचे वातावरण निर्माण झाले.
दरम्यान, घटनास्थळी जात असताना युवा क्रांती फाउंडेशन अंतर्गत महाराष्ट्र राज्य पोलीस मित्र संघटनेच्या कार्यकर्त्यांना स्थानिक नागरिकांनी माहिती दिली की आरोपी चालक पळून जात आहे. त्यानुसार संघटनेच्या पथकाने तत्काळ पाठलाग करून संबंधित चालकाला पकडले.
त्यानंतर पुढील चौकातील ट्रॅफिक पोलिसांना संपूर्ण माहिती देऊन चालक व टेम्पो त्यांच्या ताब्यात देण्यात आला.
या कारवाईत पश्चिम महाराष्ट्र उपाध्यक्ष राजू चौधरी, युवा सचिव अमितजी तांबे, पुणे जिल्हा युवा अध्यक्ष किशोर गायकवाड आणि फुरसुंगी युवा सदस्य महेश कडदेकर यांचा सहभाग होता.
या तत्पर कारवाईबद्दल स्थानिक नागरिक व पोलिस प्रशासनाकडून संघटनेचे आभार मानण्यात आले. नागरिकांच्या सुरक्षिततेसाठी संघटना कायम तत्पर असल्याचे पदाधिकाऱ्यांनी सांगितले.
