सोनगाव : वार्ताहर
अखिल भारतीय महात्मा फुले समता परिषद या संघटनेची राज्य कार्यकारिणी बैठक नुकतीच मुंबई येथील एमआयटी परिसरात संपन्न झाली. या बैठकीचे अध्यक्षस्थान संस्थापक अध्यक्ष तथा राज्याचे उपमुख्यमंत्री व अन्न व नागरी पुरवठा मंत्री छगन भुजबळ यांनी भूषवले.
या बैठकीस कार्याध्यक्ष खासदार समीर भुजबळ, विधानपरिषदेचे सदस्य आमदार पंकज भुजबळ, तसेच बापूसाहेब भुजबळ, डॉ. कैलास कमोद, रविभाऊ सोनवणे, बाळासाहेब कर्डेक, सत्संग मुंडे, ईश्वर बाळबुद्धे यांच्यासह राज्यातील अनेक मान्यवर उपस्थित होते.
बैठकीत संघटनेच्या विविध कामांचा आढावा घेण्यात आला तसेच कार्यकर्त्यांच्या कामगिरीनुसार नवीन पदाधिकारी नियुक्त्यांवर निर्णय घेण्यात आला. यावेळी नवनियुक्त पदाधिकाऱ्यांना नियुक्तीपत्रांचे वितरण छगन भुजबळ यांच्या हस्ते करण्यात आले.
या कार्यक्रमात अहिल्यानगर उत्तर जिल्ह्यातील अनेक नियुक्त्या जाहीर करण्यात आल्या. त्यामध्ये राहुरी तालुक्यातील ब्राह्मणी येथील प्रशांत रामदास शिंदे यांची जिल्हाध्यक्षपदी फेरनिवड करण्यात आली. तसेच राहुरी तालुकाध्यक्षपदी किरण पाराजी अंत्रे (सोनगाव), राहुरी शहराध्यक्षपदी भूषण मदने, नेवासा तालुकाध्यक्षपदी बाळासाहेब जावळे, नेवासा शहराध्यक्षपदी कल्याण काळे, श्रीरामपूर तालुकाध्यक्षपदी चंद्रकांत झुरंगे, श्रीरामपूर शहराध्यक्षपदी विवेक गिरमे, अकोले तालुकाध्यक्षपदी नवनाथ गायकवाड तर कार्याध्यक्षपदी किशोर झोडगे यांची नियुक्ती करण्यात आली.
नवनियुक्त पदाधिकाऱ्यांना मान्यवरांच्या हस्ते नियुक्तीपत्र देण्यात आले. यावेळी सर्व पदाधिकाऱ्यांचे अभिनंदन करून त्यांना सामाजिक कार्यासाठी शुभेच्छा देण्यात आल्या.
जिल्हा कार्यकारिणीतील उर्वरित पदनियुक्त्या लवकरच जाहीर करण्यात येतील, अशी माहिती जिल्हाध्यक्ष प्रशांत शिंदे यांनी दिली. कार्यक्रमास विविध सामाजिक कार्यकर्ते व समता सैनिक मोठ्या संख्येने उपस्थित होते.
