बातमी :
पुणे : शहरात पाणी टँकर व्यवस्थापनातील गैरप्रकार उघडकीस आल्यानंतर Pune Municipal Corporation (महापालिका) प्रशासनाने कठोर पावले उचलण्यास सुरुवात केली आहे. मोफत पाण्याची बेकायदेशीर विक्री, वाहतूक नियमांचे उल्लंघन आणि निष्काळजी वाहनचालक यामुळे टँकर व्यवस्था पुन्हा चर्चेत आली असून यावर नियंत्रणासाठी कडक नियमावली आणि “कोड सिस्टीम” लागू करण्याची तयारी सुरू आहे.
पुणे शहर व उपनगरातील ज्या भागांत पाईपलाईनद्वारे पाणीपुरवठा शक्य नाही, त्या ठिकाणी टँकरच्या माध्यमातून पाणी पुरवठा केला जातो. यासाठी महापालिका तब्बल ८१६ टँकरचा वापर करत असून त्यावर कोट्यवधी रुपयांचा खर्च होतो. मात्र काही चालकांकडून मोफत मिळणारे पाणी इतरत्र विकले जात असल्याचे प्रकार समोर आल्याने प्रशासनात खळबळ उडाली आहे.
याशिवाय वाहतूक नियमांचे उल्लंघन, बेकायदेशीर वाहनचालना आणि चालकांकडे वैध परवाना किंवा प्रशिक्षण नसल्याच्या तक्रारी वाढल्या आहेत. मोहम्मद वाडी परिसरात एका टँकर चालकाच्या निष्काळजीपणामुळे नागरिकाचा मृत्यू झाल्याच्या घटनेनंतर हा प्रश्न अधिक गंभीर बनला आहे.
या पार्श्वभूमीवर झालेल्या स्थायी समितीच्या बैठकीत या मुद्द्यावर जोरदार चर्चा झाली. टँकरमुळे होणारे अपघात टाळण्यासाठी प्रशासनाने कठोर भूमिका घ्यावी, असे निर्देश देण्यात आले. स्थायी समितीचे अध्यक्ष श्रीनाथ भिमाने यांनी सांगितले की, महापालिका आयुक्त लवकरच यासंदर्भात सविस्तर नियमावली तयार करणार आहेत.
नागरिकांच्या सुरक्षेच्या दृष्टीने तसेच टँकर व्यवस्थेतील गैरप्रकार रोखण्यासाठी कडक अंमलबजावणी आवश्यक असल्याचे मत व्यक्त करण्यात येत आहे.
