मळद येथे श्री भैरवनाथ यात्रा उत्साहात संपन्न; कुस्त्यांचे जंगी मैदान आणि सांस्कृतिक कार्यक्रमांची मेजवानी

​मळद ( बापू नवले ):
दौंड तालुक्यातील मळद येथे ग्रामदैवत श्री भैरवनाथ महाराज यांची वार्षिक यात्रा मोठ्या उत्साहात आणि पारंपरिक वातावरणात संपन्न झाली. यात्रा कमिटीचे नवनिर्वाचित अध्यक्ष किशोरजी नवले यांच्या उपस्थितीत मानाचे विडे देऊन यात्रा संपन्न झाली
​धार्मिक कार्यक्रमांनी यात्रेचा प्रारंभ

​यात्रेच्या पहिल्या दिवशी, १० एप्रिल २०२६ (शुक्रवार) रोजी पहाटे ५:३० वाजता श्री भैरवनाथ महाराजांचा महाअभिषेक करण्यात आला. सकाळी साडेसात वाजल्यापासून भक्तांचे दंडवत आणि शेरणी वाटपाचा कार्यक्रम पार पडला. त्यानंतर ग्रामस्थांच्या वतीने सामूहिक दंडवत अर्पण करण्यात आले.
​छबिना आणि दारुकाम
​रात्री साडेआठ वाजता पारंपरिक वाद्यांच्या आणि लेझीमच्या गजरात श्री भैरवनाथ महाराजांचा छबिना काढण्यात आला. यावेळी करण्यात आलेली आकर्षक विद्युत रोषणाई आणि भव्य दारुगोळ्याची आतिशबाजी हे ग्रामस्थांसाठी मुख्य आकर्षण ठरले. छबिना संपल्यानंतर ‘लोककला आनंद लोकनाट्य तमाशा (जळगावकर)’ या कार्यक्रमातून रसिक प्रेक्षकांचे मनोरंजन करण्यात आले…

​कुस्त्यांचे जंगी मैदान आणि मनोरंजनाची पर्वणी
​शनिवारी, ११ एप्रिल २०२६ रोजी यात्रेच्या दुसऱ्या दिवशी सकाळी ‘हजऱ्याचा’ कार्यक्रम पार पडला. दुपारी ४ वाजता कुस्त्यांचा भव्य आखाडा भरवण्यात आला होता, ज्यामध्ये नामवंत मल्लांनी आपले कसब दाखवले. रात्री ७ वाजता मानाचा विडा देऊन मनोरंजनासाठी ‘आकाश व्हिजन’ हा ऑर्केस्ट्राचा कार्यक्रम पार पडला.
​श्री भैरवनाथ यात्रा कमिटी, मळद (ता. दौंड, जि. पुणे) आणि समस्त ग्रामस्थांच्या अथक प्रयत्नातून ही यात्रा अत्यंत शिस्तबद्ध पद्धतीने आणि उत्साहात साजरी झाली. यात्रेनिमित्त मळद परिसरात भक्तांमध्ये आनंदाचे वातावरण पाहायला मिळाले.