कोळसेवाडी पोलिस ठाण्याच्या पोलिसांची मोठी कारवाई
(आनंद गायकवाड)
कल्याण : शहर परिसरात वाढत असलेल्या वाहन चोरीच्या घटनांना आळा घालण्यासाठी कोळसेवाडी पोलिसांनी विशेष मोहीम राबवत सराईत आरोपीला अटक केली असून त्याच्याकडून तब्बल ३ लाख ५५ हजार रुपये किमतीच्या १० मोटरसायकली जप्त करण्यात आल्या आहेत.
पोलीस उप आयुक्त परि. ३ कल्याण श्री. अतुल झेंडे, सहाय्यक पोलीस आयुक्त कल्याण विभाग श्री. कल्याणजी घेटे, वरिष्ठ पोलीस निरीक्षक श्री. हेमंत गुरव यांच्या मार्गदर्शनाखाली कोळसेवाडी पोलीस ठाण्याचे पथक वाहन चोरीच्या गुन्ह्यांचा तपास करत होते.
दि. ०३ एप्रिल २०२६ रोजी पोलीस शिपाई सुरेंद्र इंगळे यांना मिळालेल्या गुप्त माहितीच्या आधारे विठ्ठलवाडी रेल्वे स्थानक परिसरात सापळा रचण्यात आला. यावेळी संशयित हालचाली करणाऱ्या दोन इसमांवर नजर ठेवण्यात आली. पोलिसांनी तत्काळ कारवाई करत शिताफीने शुबम उर्फ शिवम संपत पठारे (वय २४, रा. पंजाबी कॉलनी, गुरुद्वाराजवळ, उल्हासनगर) याला ताब्यात घेतले.
चौकशीत आरोपीने विठ्ठलवाडी, महात्मा फुले चौक तसेच उल्हासनगर परिसरातून मोटरसायकली चोरी केल्याची कबुली दिली. त्यानुसार पोलिसांनी विविध ठिकाणांहून चोरीस गेलेल्या एकूण १० मोटरसायकली जप्त केल्या. या प्रकरणात मोटरसायकल चोरीचे एकूण ८ गुन्हे उघडकीस आले आहेत.
सदर आरोपीविरुद्ध कोळसेवाडी पोलीस ठाण्यात गुन्हा दाखल करण्यात आला असून पुढील तपास सुरू आहे.
ही कारवाई पोलीस उप आयुक्त श्री. अतुल झेंडे, सहाय्यक पोलीस आयुक्त श्री. कल्याणजी घेटे, वरिष्ठ पोलीस निरीक्षक श्री. हेमंत गुरव यांच्या मार्गदर्शनाखाली पोलीस पथकाने यशस्वीपणे पार पाडली.
श्रीकांत रा धोकटे
(ठाणे शहर लोकप्रतिनिधी)
