अंदरसूल/ श्री सुनिल गायकवाड
अजिंक्यतारा शिक्षण प्रसारक मंडळाच्या अंतर्गत कार्यरत असलेल्या गुणवंत शिक्षक व शिक्षकेतर कर्मचाऱ्यांनी आपल्या उल्लेखनीय कार्यामुळे पुन्हा एकदा संस्थेचे नाव उज्ज्वल केले आहे.
शिवसेना नाशिक जिल्ह्याच्या वतीने हिंदुहृदयसम्राट शिवसेनाप्रमुख स्व. बाळासाहेब ठाकरे यांच्या स्मृतीप्रित्यर्थ देण्यात येणाऱ्या गुणवंत शिक्षक व शिक्षकेतर कर्मचारी पुरस्काराने श्री भुलेश्वर माध्यमिक विद्यालय भुलेगाव येथील लिपिक श्री बाळासाहेब मोरे आण्णाजी यांना सन्मानित करण्यात आले. त्यांच्या या यशाबद्दल विद्यालयातील शिक्षक व शिक्षकेतर वृंदाने मनःपूर्वक अभिनंदन केले.
तसेच, संस्थेच्या ज्ञानप्रकाश प्राथमिक आश्रमशाळा राजापूर येथील मुख्याध्यापक श्री. दिपक जाधव यांना सामाजिक क्षेत्रातील उल्लेखनीय कार्याबद्दल विशेष पुरस्कार प्रदान करण्यात आला. याचबरोबर शिक्षक श्री. वाघचौरे सर यांनाही त्यांच्या कार्याची दखल घेऊन सन्मानित करण्यात आले. या तिघांच्याही यशामुळे संस्थेचा गौरव वाढला आहे.
या यशस्वी कामगिरीबद्दल श्री भुलेश्वर माध्यमिक विद्यालय भुलेगावचे श्री उंडे सर यांनी सर्व विजेत्यांचे कौतुक केले. तसेच संस्थापक आदरणीय श्री प्रकाशराव कोल्हे सर यांनी आपल्या अमृतवाणी मार्गदर्शनातून सर्वांचे अभिनंदन करत पुढील कार्यासाठी प्रेरणा दिली.
या यशामुळे संपूर्ण संस्थेत आनंदाचे वातावरण निर्माण झाले असून, सर्व स्तरातून विजेत्यांवर अभिनंदनाचा वर्षाव होत आहे.
