लोखंडी सावरगाव येथे भीषण अपघात; २० वर्षीय तरुणाचा जागीच मृत्यू

अंबाजोगाई( प्रतिनिधी)

अंबाजोगाई धानोरा (खुर्द) गावाहून अंबाजोगाईकडे येत असताना लोखंडी सावरगाव परिसरात आज एक भीषण अपघात घडला असून यात २० वर्षीय तरुणाचा जागीच मृत्यू झाल्याची धक्कादायक घटना समोर आली आहे.
मिळालेल्या प्राथमिक माहितीनुसार, अथर्व महादेव ढगे (वय २०, रा. धानोरा खुर्द) हा तरुण आपल्या कामानिमित्त अंबाजोगाईकडे येत असताना त्याच्या वाहनाची समोरून येणाऱ्या शिवाई बस (क्रमांक MH 49 BZ 9581) ला जोरदार धडक झाली. हा अपघात इतका भीषण होता की, अथर्व याचा जागीच मृत्यू झाला.

घटनेची माहिती मिळताच स्थानिक नागरिकांनी तत्काळ घटनास्थळी धाव घेत मदतकार्य सुरू केले. दरम्यान, पोलीसही घटनास्थळी दाखल झाले असून पंचनामा करण्याचे काम सुरू आहे.
या अपघातामुळे परिसरात काही काळ तणावाचे वातावरण निर्माण झाले होते. तरुणाच्या अचानक झालेल्या मृत्यूमुळे धानोरा (खुर्द) गावावर शोककळा पसरली आहे.
या प्रकरणी पुढील तपास पोलीस करत आहेत.