(नांदेड प्रतिनिधी:मोईन )
किनवट – शहरात डॉ. बाबासाहेब आंबेडकर जयंतीनिमित्त लावण्यात आलेल्या शुभेच्छा बॅनरची अज्ञात समाजकंटकांकडून तोडफोड केल्याची गंभीर घटना उघडकीस आली आहे. या प्रकरणी राष्ट्रवादी काँग्रेस पक्षाचे कार्यकर्ते सुगत नगराळे यांनी किनवट पोलीस ठाण्यात लेखी तक्रार दाखल केली असून, दोषींवर कठोर कारवाई करण्याची मागणी केली आहे.
तक्रारीनुसार, आंबेडकर जयंतीनिमित्त शहरातील विविध ठिकाणी नागरिक, पदाधिकारी व सामाजिक कार्यकर्त्यांकडून शुभेच्छा बॅनर लावण्यात आले होते. मात्र काही अज्ञात व्यक्तींनी सलग तीन दिवसांत वेगवेगळ्या ठिकाणी हे बॅनर फाडून टाकत जाणीवपूर्वक अवमान केल्याचा आरोप करण्यात आला आहे. या प्रकारामुळे शहरातील सामाजिक सलोखा धोक्यात येण्याची शक्यता व्यक्त होत आहे.
तोडफोड झालेल्या ठिकाणांमध्ये नगरसेविका सौ. ललिता मारोती मुनेश्वर यांच्या वस्ती परिसरातील बॅनर, अशोक स्तंभाजवळ श्रीनिवास नेम्मानिवार मित्रमंडळ यांचा बॅनर तसेच नगरसेविका ललिता मुनेश्वर व सामाजिक कार्यकर्ते मारोती मुनेश्वर यांच्या शासकीय गोदान, डॉ. आंबेडकर चौक परिसरातील बॅनरचा
समावेश आहे. या घटनेमुळे डॉ. बाबासाहेब आंबेडकर यांच्या जयंतीचा अवमान झाल्याची भावना नागरिकांमध्ये निर्माण झाली असून, ही घटना जाणीवपूर्वक घडवून आणण्यात आल्याचा संशय व्यक्त केला जात आहे. परिणामी, कायदा व सुव्यवस्थेचा प्रश्न निर्माण होण्याची भीतीही व्यक्त होत आहे. सुगत नगराळे यांनी आपल्या तक्रारीत पोलिस प्रशासनाकडे तात्काळ चौकशी करून संबंधित आरोपींचा शोध घेण्याची, त्यांच्यावर कठोर कायदेशीर कारवाई करण्याची तसेच भविष्यात अशा घटना टाळण्यासाठी योग्य प्रतिबंधात्मक उपाययोजना राबविण्याची मागणी केली आहे. दरम्यान, या प्रकारामुळे शहरात संतापाचे वातावरण निर्माण झाले असून, पोलिसांनी या प्रकरणाची गांभीर्याने दखल घेऊन त्वरीत कारवाई करावी, अशी जोरदार मागणी नागरिकांकडून होत आहे.
