दरेगाव / प्रतिनिधी :
येथून जवळ असलेल्या साखरखेर्डा येथे आयोजित धार्मिक प्रवचनात ह.भ.प. दिगंबर गाडे यांनी आरोग्य, जीवनशैली आणि संस्कार यांवर मार्गदर्शन करत “रोग जवळ येणे म्हणजे कर्माचे फळ” असे प्रतिपादन केले.
आपल्या प्रवचनात त्यांनी सांगितले की, व्यसन हे पाप असून ते शरीर आणि मन दोन्हींचे नुकसान करते. वाईट सवयी, चुकीचे विचार आणि अनियमित जीवनशैलीमुळे शरीर हळूहळू आजारांकडे झुकते. त्यामुळे मनातील वाईट विचार दूर करून जीवन शुद्ध आणि निरोगी ठेवण्याची गरज आहे.
ते पुढे म्हणाले की, “आपले शरीर हे देवाचे देणे आहे. त्याची योग्य काळजी घेतली पाहिजे. रोज व्यायाम, प्राणायाम आणि चांगल्या लोकांच्या संगतीत राहणे आवश्यक आहे.”
यावेळी त्यांनी हृदयाचे उदाहरण देत सांगितले की, “तुम्ही रोज एक तास माझ्यासाठी चालत राहा, मी आयुष्यभर तुमच्यासाठी चालत राहीन,” असा संदेश देत त्यांनी नियमित चालण्याचे महत्त्वही पटवून दिले.
या प्रवचनामुळे उपस्थित भाविकांना आरोग्यदायी जीवनशैलीचा संदेश मिळाला असून कार्यक्रमात मोठ्या संख्येने नागरिक उपस्थित होते.
