नांदेड / प्रतिनिधी :
नांदेडमध्ये ६ एप्रिल रोजी घडलेल्या शिवसेना कार्यकर्ता सोनू कल्याणकर (वय ३५) यांच्या खून प्रकरणाचा पोलिसांनी उलगडा केला असून, या हत्येमागे प्रेयसीची आईच सूत्रधार असल्याचे तपासात निष्पन्न झाले आहे. या धक्कादायक घटनेमुळे संपूर्ण मराठवाड्यात खळबळ उडाली आहे.
शहरातील श्रीनगर भागात पहाटे मॉर्निंग वॉकसाठी गेलेल्या सोनू कल्याणकर यांच्यावर चार हल्लेखोरांनी धारदार शस्त्रांनी हल्ला केला होता. या हल्ल्यात त्यांचा जागीच मृत्यू झाला होता. घटनेनंतर राजकीय वातावरणही तापले होते.
पोलिस तपासात समोर आलेल्या माहितीनुसार, जुन्या प्रेमसंबंधातून हा खून घडवून आणण्यात आला. या प्रकरणातील मुख्य आरोपी म्हणून इंदुबाई मंगनाळे या महिलेला ताब्यात घेण्यात आले असून, तिने गुन्ह्याची कबुली दिली आहे.
तपासात उघड झालेल्या माहितीनुसार, सोनू कल्याणकर यांचे सुमारे १० ते १२ वर्षांपूर्वी एका तरुणीसोबत प्रेमसंबंध होते. मात्र, मुलीच्या कुटुंबीयांचा या नात्याला तीव्र विरोध होता. संबंधित तरुणीचे लग्न दुसरीकडे ठरवले असताना सोनू यांनी ते लग्न मोडल्याचा राग कुटुंबीयांच्या मनात होता. याच सूडातून इंदुबाई मंगनाळे यांनी कट रचून मारेकऱ्यांना लाखो रुपयांची सुपारी दिल्याचे उघड झाले आहे.
तपासादरम्यान, “जोपर्यंत सोनू मरणार नाही, तोपर्यंत मला शांत झोप लागणार नाही,” असे वक्तव्य त्यांनी आपल्या मुलाच्या मित्राकडे केल्याची माहितीही समोर आली आहे.
सुरुवातीला या प्रकरणात संबंधित तरुणीच्या भावावर संशय व्यक्त करण्यात आला होता. मात्र पुढील तपासात वेगळेच वास्तव समोर आले. आरोपी महिलेचा मुलगा कुख्यात गुन्हेगारी टोळीशी संबंधित असून सध्या कारागृहात असल्याची माहिती पोलिसांनी दिली आहे.
दरम्यान, २०२१ मध्येही याच वादातून सोनू कल्याणकर यांच्यावर गोळीबार झाला होता. त्या वेळी ते बचावले होते. अखेर जुन्या वैमनस्यातूनच त्यांची हत्या झाल्याचे स्पष्ट झाले असून पोलिस पुढील तपास करत आहेत.
