तळेरे/अंकित घाडीगावकर,
सध्या सर्वत्र उन्हाची तीव्रता प्रचंड वाढली असून, तीव्र उष्णतेचा त्रास सर्वसामान्यांना जाणवत आहे. या वाढत्या उष्णतेच्या पार्श्वभूमीवर तळेरे आरोग्य उपकेंद्रातील पिण्याच्या पाण्याची समस्या लक्षात घेऊन ग्रामपंचायतीने सामाजिक बांधिलकी जपत एक अत्यंत कौतुकास्पद आणि लोकाभिमुख पाऊल उचलले आहे. तळेरे येथील स्थानिक आरोग्य उपकेंद्रामध्ये उपचारासाठी येणारे रुग्ण, त्यांचे नातेवाईक आणि अहोरात्र सेवा देणारे वैद्यकीय कर्मचारी यांच्यासाठी ग्रामपंचायतीच्या वतीने सरपंच हनुमंत तळेकर यांच्या हस्ते’वॉटर फिल्टर’ प्रदान करण्यात आले आहे. यामुळे येथे येणाऱ्या प्रत्येकाला आता शुद्ध व थंड पिण्याचे पाणी उपलब्ध होणार आहे.
उन्हाळ्याच्या दिवसांत ग्रामीण भागातील आरोग्य केंद्रांमध्ये रुग्णांची संख्या वाढत असते. उपचारासाठी येणाऱ्या गरजू रुग्णांना आणि त्यांच्यासोबत असणाऱ्या नातेवाईकांना पिण्याच्या पाण्यासाठी भटकंती करावी लागू नये, तसेच तीव्र उष्णतेमध्ये सर्वांची पाण्याची सोय व्हावी, यासाठी तळेरे ग्रामपंचायतीचे सरपंच हनुमंत तळेकर यांनी तातडीने पुढाकार घेतला. त्यांच्या संकल्पनेतून आणि ग्रामपंचायतीच्या माध्यमातून हे वॉटर फिल्टर मशीन आरोग्य उपकेंद्रात बसवण्यात आले आहे.
आरोग्य उपकेंद्रात अविरत सेवा बजावणाऱ्या वैद्यकीय कर्मचाऱ्यांनी आणि उपचारासाठी येणाऱ्या नागरिकांनी ग्रामपंचायतीच्या या सुविधेबद्दल समाधान व्यक्त केले आहे. रणरणत्या उन्हात उपकेंद्रातच थंड आणि शुद्ध पाणी मिळणार असल्याने रुग्णांना दिलासा मिळाला आहे.
या प्रसंगी उपसरपंच संदीप घाडी, ग्रामविकास अधिकारी राजलक्ष्मी जाधव, तळेरे उपकेंद्राच्या आरोग्य अधिकारी. धनश्री जाधव, पोलीस पाटील. चंद्रकांत चव्हाण , सामाजिक कार्यकर्ते राजेश जाधव तसेच उपकेंद्रातील इतर कर्मचारी उपस्थित होते.
तळेरे गावाच्या विकासासोबतच नागरिकांच्या आरोग्याच्या दृष्टीने काळजी घेणाऱ्या सरपंच हनुमंत तळेकर यांचे आणि संपूर्ण ग्रामपंचायत प्रशासनाचे ग्रामस्थांनी आभार मानले आहेत
