स्वर आले जुळूनी या भावगीत व भक्ती गीत कार्यक्रमाला स्वामी भक्तांचा उदंड प्रतिसाद
तळेरे : कणकवली तालुक्यातील दारूम गावडेवाडी येथील श्री स्वामी समर्थ उपासना मठात बुधवारी श्री स्वामी समर्थ महाराज पुण्यतिथी सोहळा मोठ्या उत्साहात साजरा झाला. यानिमित्त दिवसभर विविध धार्मिक विधी आणि सांस्कृतिक कार्यक्रमांना भाविकांची मोठ्या प्रमाणात उपस्थिती होती. यावेळी भाविकांमध्ये भक्तीचे वातावरण निर्माण झाले होते.
यानिमित्त मठात सकाळी ७ वाजल्यापासून कार्यक्रमांना सुरुवात झाली. सकाळी ७ ते ८ या वेळेत ‘श्रीं’ची महापूजा व अभिषेक त्यानंतर ८ ते १० या वेळेत स्वामीभक्तांकडून ‘श्री स्वामी समर्थ सारामृत’ ग्रंथाचे सामूहिक पारायण करण्यात आले. त्यानंतर लघुरुद्र स्वाहाकार (हवन) झाले. दुपारी १ वाजता आरती व ‘श्रीं’ना नैवेद्य अर्पण करण्यात येऊन दुपारी २ वाजल्यापासून भाविकांसाठी दर्शन सोहळा सुरू झाला.
या सोहळ्याचे खास आकर्षण असलेले ‘स्वर आले जुळूनी’ ही भक्ती व भावगीतांच्या मैफलीला रसिकांनी तुफान गर्दी केली होती. ‘सारेगम’ फेम व सुर नवा ध्यास नवा उपविजेती सुप्रसिद्ध गायिका संज्योती जगदाळे आणि पंडित संजीव अभ्यंकर यांचे शिष्य हर्ष नकाशे आपल्या सुमधुर स्वरांनी स्वामी चरणी सेवा अर्पण केली.
