यवत (ता. दौंड) | प्रतिनिधी:
मौजे वरवंड (ता. दौंड, जि. पुणे) येथे घडलेल्या एटीएम चोरी प्रकरणाचा यवत पोलिसांनी यशस्वी उलगडा करत परराज्यातील दोन सराईत आरोपींना अटक केली आहे.
दि. ०२/०३/२०२६ रोजी सकाळी ८ वाजण्यापूर्वी वरवंड गावातील बसस्टँडजवळ अब्दुल पटेल यांच्या जागेतील पत्र्याच्या उघड्या गाळ्यात बसविण्यात आलेले India 1 Payments Ltd. कंपनीचे एटीएम मशीन अज्ञात चोरट्यांनी ओढून नेले. या एटीएममध्ये असलेली सुमारे ७ लाख १३ हजार ३०० रुपये रोख रक्कमही लंपास करण्यात आली होती. याप्रकरणी यवत पोलीस ठाण्यात गुन्हा रजिस्टर क्रमांक १९७/२०२६ अंतर्गत भारतीय न्याय संहिता २०२३ च्या कलम ३०५ नुसार गुन्हा दाखल करण्यात आला होता.
घटनेचा तपास करताना यवत पोलिसांच्या गुन्हे शोध पथकाने घटनास्थळावरील सीसीटीव्ही फुटेजची पाहणी केली तसेच तांत्रिक विश्लेषण (डम्प डेटा) करून आरोपींचा माग काढला. त्यानंतर जळगाव येथे छापा टाकून दोन संशयितांना अटक करण्यात आली.
अटक आरोपी:
- मोबीन आलज बिल्ला नजीर (वय २८, रा. सहारनपूर, उत्तर प्रदेश)
- अब्दुल करीम नुर हसन कुरेशी (वय ५२, रा. सारंगपूर, उत्तर प्रदेश)
या आरोपींकडून पुढील तपास सुरू असून अधिक गुन्ह्यांचा उलगडा होण्याची शक्यता पोलिसांनी व्यक्त केली आहे. या प्रकरणाचा पुढील तपास पोलीस उपनिरीक्षक मारोती मेतलवाड करत आहेत.
ही कारवाई पोलीस अधीक्षक संदीपसिंह गिल, अपर पोलीस अधीक्षक गणेश बिरादार, उपविभागीय पोलीस अधिकारी बापुराव दडस यांच्या मार्गदर्शनाखाली यवत पोलीस स्टेशनचे पोलीस निरीक्षक नारायण देशमुख यांच्या नेतृत्वाखालील पथकाने केली.
🔍 तांत्रिक तपास आणि वेगवान कारवाईमुळे गंभीर चोरी प्रकरणाचा उलगडा करण्यात पोलिसांना यश आले आहे.
