माजी आमदार डॉ. संजय रायमुलकर यांच्या सूचनेनुसार उपजिल्हाप्रमुख आरतीताई दीक्षित यांचा प्रशासनाकडे पाठपुरावा; महिलांच्या तक्रारींचे निवारण
मेहकर (प्रतिनिधी) : मेहकर तालुक्यातील मेळजानोरी येथील रेशन दुकानदाराकडून कार्डधारकांना धान्य वितरणात अनियमितता आणि गैरवर्तनाचा त्रास होत असल्याच्या तक्रारी समोर आल्या होत्या. या तक्रारींची दखल घेत माजी आमदार डॉ. संजय रायमुलकर यांच्या सूचनेनुसार शिवसेनेच्या उपजिल्हाप्रमुख सौ. आरतीताई दीक्षित यांनी प्रशासनाकडे पाठपुरावा केला. त्यांच्या प्रयत्नांनंतर संबंधित महिलांच्या तक्रारींचे निवारण झाल्याचे सांगण्यात आले.
मेळजानोरी येथील त्रस्त महिलांनी रेशन दुकानदाराविरोधात अनेक गंभीर आरोप केले होते. ठरवून दिलेल्या वजनापेक्षा कमी धान्य देणे, मात्र पावती पूर्ण वजनाची देणे, शासकीय दरापेक्षा अधिक पैसे घेणे, दुकान वेळेवर न उघडणे, धान्य वितरणानंतर अधिकृत मशीनची पावती न देणे, तसेच धान्याबाबत विचारणा केल्यास अपशब्द वापरणे आणि रेशन कार्ड रद्द करण्याची धमकी देणे, अशा तक्रारी महिलांनी केल्या. काही लाभार्थ्यांच्या पावत्या काढूनही त्यांना धान्य दिले जात नसल्याचाही आरोप करण्यात आला.
या प्रकाराला कंटाळून मेळजानोरी येथील महिलांनी माजी आमदार डॉ. संजय रायमुलकर, उपजिल्हाप्रमुख सौ. आरती दीक्षित आणि शिवसेना तालुकाप्रमुख सुरेश तात्या वाळुकर यांची भेट घेऊन आपली व्यथा मांडली. त्यावेळी माजी आमदार रायमुलकर हे उपोषणस्थळी व्यस्त असल्याने त्यांनी प्रकरणाचे गांभीर्य लक्षात घेऊन महिलांच्या तक्रारींचे निवारण करण्याची जबाबदारी आरती दीक्षित यांच्यावर सोपवली.
त्यानुसार आरती दीक्षित यांनी तातडीने उपविभागीय अधिकारी (एसडीओ) आणि मेहकर तहसीलदार यांची भेट घेतली. रेशन दुकानदाराविरोधातील तक्रारी आणि उपलब्ध पुरावे प्रशासनासमोर मांडून कारवाईची मागणी केली. या पाठपुराव्यानंतर प्रशासनाने दखल घेतली आणि महिलांच्या मागण्यांवर कार्यवाही झाल्याचे सांगण्यात आले.
आपल्या हक्काचे धान्य मिळवून देण्यासाठी पुढाकार घेतल्याबद्दल मेळजानोरी येथील महिलांनी माजी आमदार डॉ. संजय रायमुलकर, सौ. आरती दीक्षित आणि शिवसेना तालुकाप्रमुख सुरेश तात्या वाळुकर यांचे आभार मानले.
“जनतेच्या हक्कासाठी आणि अन्यायाविरुद्ध आमचा लढा असाच अविरत सुरू राहील,” अशी भूमिका उपजिल्हाप्रमुख सौ. आरती दीक्षित यांनी यावेळी व्यक्त केली.
