कोल्हापूर | प्रतिनिधी
जिल्हा शल्य चिकित्सक अधिनस्त जिल्हा शीघ्र हस्तक्षेप केंद्र (DEIC) आणि राष्ट्रीय बाल स्वास्थ्य कार्यक्रम (RBSK) अंतर्गत सन २०२५-२६ या वर्षात शस्त्रक्रिया व आरोग्य सेवांमध्ये उत्कृष्ट कामगिरी करणाऱ्या डॉक्टर, वैद्यकीय पथके आणि कर्मचाऱ्यांचा विशेष गौरव समारंभ कोल्हापूर येथील सेवा रुग्णालय, कसबा बावडा येथे संपन्न झाला. हा कार्यक्रम दि. ८ मे २०२६ रोजी पार पडला.
या कार्यक्रमात मान्यवरांच्या हस्ते संबंधित डॉक्टर, अधिकारी आणि कर्मचाऱ्यांना सन्मानचिन्ह व प्रशस्तीपत्र देऊन गौरविण्यात आले.
तज्ञ डॉक्टरांचा सन्मान
शासकीय वैद्यकीय महाविद्यालयातील बाल शल्य चिकित्सक डॉ. शिवप्रसाद हिरुगडे, सर्जन डॉ. सुनील कुरुंदवाडे, कान-नाक-घसा तज्ञ डॉ. दिलीप वाडकर, भूलतज्ञ डॉ. सुश्रुत नाडकर्णी, डॉ. जयंता पाटील, डॉ. महेंद्र कुंभोजकर तसेच शल्य चिकित्सक डॉ. धीरज महाजन यांचा विशेष सत्कार करण्यात आला.
यासोबतच RBSK पथक क्रमांक १, २ व ३, DEIC चे अधिकारी व कर्मचारी, ऑपरेशन थिएटर (OT) स्टाफ, आंतररुग्ण विभाग तसेच महात्मा ज्योतिराव फुले जनआरोग्य योजना (MJPJY) स्टाफ यांचाही गौरव करण्यात आला.
“गौरवामुळे कर्मचाऱ्यांना नवी ऊर्जा मिळते”
कार्यक्रमाच्या अध्यक्षस्थानी कोल्हापूर मंडळाचे उपसंचालक डॉ. दिलीप माने होते. मार्गदर्शन करताना त्यांनी सांगितले की, “उत्कृष्ट सेवा देणाऱ्या कर्मचाऱ्यांचा गौरव केल्याने त्यांचे मनोबल वाढते आणि कामासाठी नवी ऊर्जा मिळते. अशा उपक्रमांमुळे जिल्ह्याच्या आरोग्य सेवेचा दर्जा अधिक उंचावण्यास मदत होते.”
जिल्हा शल्य चिकित्सक डॉ. सरिता थोरात यांनी सर्व कर्मचाऱ्यांचे अभिनंदन करत त्यांच्या कार्याचे कौतुक केले. वैद्यकीय अधीक्षक डॉ. नीलिमा पाटील यांनीही उपस्थितांना मार्गदर्शन केले.
प्रगतीचा आढावा सादर
कार्यक्रमाचे प्रास्ताविक व सूत्रसंचालन DEIC चे बालरोग तज्ञ डॉ. बाबासाहेब थोरात यांनी केले. त्यांनी DEIC विभागामार्फत दिल्या जाणाऱ्या अत्याधुनिक सेवा-सुविधा आणि उपचार पद्धतींच्या प्रगतीचा आढावा सादर केला.
कार्यक्रमाच्या यशस्वी आयोजनासाठी निवासी वैद्यकीय अधिकारी डॉ. रेश्मा पाटील, डॉ. गुणाजी नलवडे, प्रज्ञा संकपाळ, मनोरमा सुंजी तसेच सेवा रुग्णालयातील सर्व टीमने विशेष परिश्रम घेतले. कार्यक्रमाची सांगता DEIC विभागाचे दंत शल्य चिकित्सक डॉ. सात्विक कुलकर्णी यांच्या आभार प्रदर्शनाने झाली.
