लोकनेते दि. बा. पाटील यांच्या नावाने नवी मुंबई आंतरराष्ट्रीय विमानतळाचे नामकरण करण्याची केंद्र सरकारकडे मागणी
उरण | प्रतिनिधी
संघर्षाच्या जात्यावर स्वतःच्या आयुष्याचे पीठ करून कष्टकरी शेतकरी आणि श्रमजीवी जनतेला स्वाभिमानाने जगण्याचे सामर्थ्य देणारे लोकनेते दि. बा. पाटील यांच्या कार्याप्रति आदर व कृतज्ञता व्यक्त करण्यासाठी नवी मुंबई आंतरराष्ट्रीय विमानतळाला ‘लोकनेते दि. बा. पाटील आंतरराष्ट्रीय नवी मुंबई विमानतळ’ असे नाव देण्यात यावे, अशी मागणी भूमिपुत्रांसह रायगड आणि ठाणे जिल्ह्यातील जनतेची आहे. केंद्र सरकारने जनभावनेचा आदर करून विमानतळाचे नामकरण करावे, असे आवाहन शेतकरी कामगार पक्षाचे (शेकाप) उरण तालुका चिटणीस रवी घरत यांनी केले.
उरण येथील सामाजिक कार्यकर्ते यशवंत ठाकूर यांच्या पुढाकाराने रायगड तोफच्या ‘देवमाणूस’ या विशेष अंकाचे प्रकाशन आयोजित करण्यात आले होते. शेकापचे उरण तालुका चिटणीस रवी घरत यांच्या हस्ते या अंकाचे प्रकाशन उत्साहात पार पडले. कार्यक्रमाच्या अध्यक्षस्थानी उरण तालुका शेकापप्रणीत सेवानिवृत्त संघटनेचे अध्यक्ष डी. आर. ठाकूर होते.
यावेळी संघटनेचे विद्यमान उपाध्यक्ष सुहास घरत, कार्याध्यक्ष यशवंत ठाकूर, सचिव काशिनाथ भोईर, सल्लागार दत्ता घरत, खजिनदार मनोहर पाटील, प्रकाश पाटील, रमेश कोळी, भ. पो. म्हात्रे, स. ही. पाटील आदी मान्यवर प्रमुख पाहुणे म्हणून उपस्थित होते.
विमानतळ नामकरणाचा प्रस्ताव केंद्राकडे; निर्णयाची प्रतीक्षा
यावेळी रवी घरत पुढे म्हणाले की, ज्या भूमीत नवी मुंबई आंतरराष्ट्रीय विमानतळ उभे राहत आहे, ती लोकनेते दि. बा. पाटील यांची जन्मभूमी आणि कर्मभूमी आहे. येथील भूमिपुत्रांनी त्यांना पाच वेळा आमदार आणि दोन वेळा खासदार म्हणून निवडून दिले होते. त्यांनी आयुष्यभर शेतकरी, कष्टकरी आणि प्रकल्पग्रस्तांच्या हक्कांसाठी संघर्ष केला.
विमानतळाला लोकनेते दि. बा. पाटील यांचे नाव देण्याबाबत महाराष्ट्र राज्याच्या विधानसभा आणि विधानपरिषदेत एकमताने ठराव मंजूर करून तसा प्रस्ताव केंद्र सरकारकडे पाठविण्यात आला आहे. मात्र, अद्याप नामकरणाचा निर्णय झालेला नाही. त्यामुळे स्थानिक जनतेमध्ये नाराजी असून, केंद्र सरकारने जनभावनेचा आदर करून लवकरात लवकर नामकरण करावे, असे आवाहन रवी घरत यांनी केले.
जनभावनेचा आदर करण्याचे मान्यवरांचे आवाहन
कार्यक्रमाचे अध्यक्ष डी. आर. ठाकूर आणि दत्ता घरत यांनीही विमानतळाला लोकनेते दि. बा. पाटील यांचे नाव देऊन भूमिपुत्रांच्या भावनांचा आदर करावा, असे आवाहन केले.
यावेळी उपस्थित मान्यवरांचे स्वागत रायगड तोफचे संस्थापक-संपादक रामचंद्र म्हात्रे यांनी केले. यशवंत ठाकूर यांनी प्रास्ताविक केले तसेच सूत्रसंचालनाची जबाबदारी पार पाडली. या कार्यक्रमाला प्रकल्पग्रस्त भूमिपुत्र मोठ्या संख्येने उपस्थित होते.
