परभणी | प्रतिनिधी
परभणी शहरातील वर्मा कॉलनी येथील विपश्यना केंद्राच्या सभागृहात साकेत पुरुष बचत गटाची मासिक बैठक मा. सरवदे डी.टी. यांच्या अध्यक्षतेखाली संपन्न झाली. या बैठकीत गटाच्या नवीन पदाधिकाऱ्यांची निवड लोकशाही पद्धतीने करण्यात आली.
संहितेनुसार दर दोन वर्षांनी पदाधिकाऱ्यांची निवड केली जाते. ११२ सभासद असलेल्या या बचत गटामार्फत विविध समाजोपयोगी उपक्रम सातत्याने राबविण्यात येतात. गुणवंत विद्यार्थ्यांचा सत्कार, महापुरुषांच्या जयंती व पुण्यतिथीनिमित्त व्याख्याने, गरजूंना मदत, वृक्षारोपण आदी उपक्रमांमुळे गटाची विशेष ओळख निर्माण झाली आहे.
यावेळी मा. नरेशजी मुळे यांची अध्यक्षपदी बहुमताने हात उंचावून व टाळ्यांच्या गजरात निवड करण्यात आली. तसेच सचिवपदी ज्ञानोबा गायकवाड तर कोषाध्यक्षपदी किरण बलखंडे यांची निवड झाली.
नवनिर्वाचित पदाधिकाऱ्यांचे उपस्थित सभासदांनी स्वागत करून पुढील वाटचालीस शुभेच्छा दिल्या. या बचत गटामध्ये बहुतांश सेवानिवृत्त कर्मचारी सहभागी असून बैठकीस मोठ्या संख्येने सभासद उपस्थित होते.
कार्यक्रमाचे प्रास्ताविक देवबाजी कांबळे यांनी केले, सूत्रसंचालन बालासाहेब शिंदे यांनी केले तर आभार प्रदर्शन प्रा. शिवाजी कांबळे यांनी मानले.
