प्रतिनिधी, सारथी महाराष्ट्राचा न्यूज
सिंदखेडराजा तालुक्यातील जऊळका परिसरातून वाहणाऱ्या खडकपूर्णा नदीपात्रात अवैध रेती उत्खननाचा व्यवसाय रात्रंदिवस सुरू असल्याचा आरोप स्थानिक शेतकरी व नागरिकांकडून करण्यात येत आहे. जेसीबीच्या साह्याने मोठ्या प्रमाणात रेती उपसा होत असून शासनाचा लाखो रुपयांचा महसूल बुडत असल्याची चर्चा परिसरात रंगली आहे.
स्थानिकांच्या म्हणण्यानुसार, नदीपात्रातून हजारो ब्रास रेतीचा उपसा सुरू असतानाही महसूल विभागाकडून कोणतीही ठोस कारवाई होत नसल्याने महसूल अधिकाऱ्यांच्या भूमिकेवर प्रश्नचिन्ह उपस्थित केले जात आहे. “कुठेतरी पाणी मुरतंय का?” अशी शंका आता शेतकरी व्यक्त करू लागले आहेत.
स्थानिक महसूल अधिकाऱ्यांना संपर्क साधण्याचा प्रयत्न केला असता, “मी माझी टीम पाठवितो,” असे सांगण्यात येते. मात्र त्यानंतर संबंधित अधिकाऱ्यांचा मोबाईल स्विच ऑफ किंवा नेटवर्क क्षेत्राबाहेर असल्याचे सांगितले जाते, असा आरोप नागरिकांनी केला आहे. तलाठ्यांशी संपर्क साधण्याचाही प्रयत्न निष्फळ ठरत असल्याचे ग्रामस्थांचे म्हणणे आहे.
नदीपात्रातून सुरू असलेला अवैध रेती उपसा तातडीने थांबवून महसूल विभागाने प्रत्यक्ष पाहणी करावी, अशी मागणी शेतकरी व नागरिकांकडून करण्यात येत आहे.
तसेच तहसीलदार आणि विभागीय अधिकारी खडसे यांनी या प्रकरणाची गंभीर दखल घेऊन रेती माफियांवर कठोर कारवाई करावी व शेतकऱ्यांना न्याय द्यावा, अशी मागणी जोर धरत आहे. आता महसूल विभाग या प्रकरणात ठोस कारवाई करणार की दुर्लक्ष करणार, याकडे परिसरातील नागरिकांचे लक्ष लागले आहे.
