पातुर ग्रामीण प्रतिनिधी
चान्नी पोलीस स्टेशन अंतर्गत येणाऱ्या वहाळा बुद्रुक येथे अज्ञात चोरट्यांनी एका मजूर कुटुंबाच्या घरात घरफोडी करून सोन्या-चांदीचे दागिने व रोख रकमेसह सुमारे एक ते दीड लाख रुपयांचा ऐवज लंपास केल्याची घटना उघडकीस आली आहे. या घटनेमुळे परिसरात भीतीचे वातावरण निर्माण झाले आहे.
मिळालेल्या माहितीनुसार, फिर्यादी मंगेश जगदेव सौंदळे हे शनिवारी रात्री घराच्या स्लॅबवर झोपण्यासाठी गेले होते. याच संधीचा फायदा घेत अज्ञात चोरट्यांनी घराचे कुलूप तोडून आत प्रवेश केला. घरातील कपाट उघडून त्यातील सोन्या-चांदीचे दागिने तसेच रोख रक्कम चोरून नेण्यात आली.
विशेष म्हणजे, सौंदळे यांना काही दिवसांपूर्वीच घरकुल योजनेचा हप्ता मिळाला होता. त्यासाठी त्यांनी बँकेतून काढलेले सुमारे ७० हजार रुपये तसेच मजुरीतून साठवलेली रोकड घरात ठेवली होती. चोरट्यांनी हीच रक्कम लक्ष्य केल्याने हे मजूर कुटुंब मोठ्या आर्थिक संकटात सापडले आहे.
चोरी करताना चोरट्यांनी अत्यंत चलाखीने घराबाहेरील लाईट बंद केली होती. तसेच शेजारी राहणाऱ्या त्यांच्या भावाच्या घरालाही बाहेरून कडी लावल्याने चोरीदरम्यान कोणालाही संशय आला नाही.
घटनेची माहिती मिळताच चाकूर पोलिसांनी घटनास्थळी धाव घेत पंचनामा केला. मंगेश सौंदळे यांच्या फिर्यादीवरून अज्ञात आरोपींविरुद्ध गुन्हा दाखल करण्यात आला असून पुढील तपास सुरू आहे.
