पारगाव प्रतिनिधी –
आळेफाटा, दि. १७ : कल्याण-अहिल्यानगर महामार्गावरील बेल्हा गावाजवळ रविवारी सायंकाळी भीषण अपघात झाला. भिवंडी आगाराची शेवगाव-कल्याण-भिवंडी ही एसटी बस स्टेअरिंग लॉक झाल्याने नियंत्रणाबाहेर जाऊन रस्त्यालगतच्या खड्ड्यात कोसळली. या भीषण अपघातात दोघांचा मृत्यू झाला असून २० ते २५ प्रवासी जखमी झाले आहेत.
मृतांमध्ये बसचालक मोहम्मद एल. वाय. सलीम (वय ४५, रा. अमरावती) आणि प्रशांत साईनाथ होणशेटे (वय २७, रा. बेल्लर, जि. नांदेड) यांचा समावेश आहे. याबाबतची माहिती आळेफाटा पोलीस स्थानकाचे पोलीस निरीक्षक विश्वास जाधव यांनी दिली.
अपघातानंतर बसमधील प्रवाशांमध्ये एकच गोंधळ उडाला. स्थानिक ग्रामस्थांनी तत्काळ मदतीसाठी धाव घेत बसच्या काचा फोडून प्रवाशांना बाहेर काढले. चालक मोहम्मद सलीम हे बसच्या केबिनमध्ये अडकले होते. त्यांना जेसीबी आणि क्रेनच्या सहाय्याने बाहेर काढण्यात आले.
या अपघातात गंभीर जखमी झालेल्या चालकासह काही प्रवाशांना ग्रामस्थांच्या मदतीने जवळच्या रुग्णालयात दाखल करण्यात आले. जखमींवर आळेफाटा येथील खासगी रुग्णालयात उपचार सुरू आहेत.
जखमी प्रवाशांमध्ये कोंडीभाऊ वाकचौरे, कमल वाकचौरे, शंकर शेजाळ, वैशाली शेजाळ, मगन पाटोळे, शोभा पाटोळे, शारदा मेंगळे, अश्विनी बहिरट, अलका गायकवाड, अरुण गुंजाळ, दीपाली डोंगरे, उल्हास तांबे, यमुना यादव पावसे, दिव्या पवार, सिद्धेश नितीन काळे, आशा नितीन काळे आणि नितीन सिद्धार्थ काळे यांचा समावेश आहे.
या अपघातामुळे काही काळ महामार्गावरील वाहतूक विस्कळीत झाली होती. घटनेचा पुढील तपास आळेफाटा पोलीस करत आहेत.
