सेलू प्रतिनिधी
भारत सरकारच्या जनगणना अधिनियम १९४८ अंतर्गत देशभरात राबविण्यात येणाऱ्या जनगणना प्रक्रियेच्या पार्श्वभूमीवर सेलू तालुक्यात घरगुती गणनेच्या पूर्वतयारीला वेग आला आहे. महाराष्ट्र शासनाच्या निर्देशानुसार तालुक्यात घरगुती गणनेच्या कामास अधिकृत सुरुवात करण्यात आली असून, पहिल्या टप्प्यात दि. १५ मे ते २४ जून २०२६ या कालावधीत ही प्रक्रिया राबविण्यात येणार आहे.
तहसीलदार शकुंतला पाराजे यांनी दिलेल्या माहितीनुसार, तालुक्यातील चिंचोली व गणेशपूर गावांमध्ये स्वगणना प्रक्रिया शंभर टक्के पूर्ण झाली आहे. तसेच घोराड येथे घरगुती गणनेच्या कामाचा शुभारंभ उत्साहात करण्यात आला. घोराड गावातील एचएलबी क्रमांक ००५९ अंतर्गत प्रगणक गणेश राठोड यांनी भव्याजी पांडुरंग राऊत यांच्या घरापासून गणनेला प्रारंभ केला.
या उपक्रमाचे उद्घाटन जनगणना कार्यालय मुंबईच्या संयुक्त संचालक कविता गोडबोले यांच्या हस्ते करण्यात आले. यावेळी उपविभागीय अधिकारी दीपक कारंडे, जिल्हा जनगणना समन्वयक मुकेश गौडाणे, नायब तहसीलदार के. डी. किरसान, मंडळ अधिकारी लड़के, संबंधित पर्यवेक्षक, मंडळातील प्रगणक तसेच घोराडच्या माजी सरपंच ज्योती घंगारे आर्दी यांच्यासह अधिकारी व कर्मचारी उपस्थित होते.
सेलू तालुक्यात एकूण २५८ घरयादी गट (HLB) निश्चित करण्यात आले असून, त्यासाठी १४९ प्रगणक व २१ पर्यवेक्षकांची नियुक्ती करण्यात आली आहे. जनगणना प्रक्रिया अचूक आणि पारदर्शक पद्धतीने पार पाडण्यासाठी प्रशासनाकडून आवश्यक तयारी करण्यात आली आहे.
जनगणना कर्मचारी घराघरांत भेटी देणार असल्याने नागरिकांनी जातनिहाय व इतर आवश्यक माहिती अचूकपणे देऊन प्रशासनाला सहकार्य करावे, असे आवाहन तहसीलदार शकुंतला पाराजे यांनी केले आहे.
