Akkalkot : महाराष्ट्राचे आराध्य दैवत मानल्या जाणाऱ्या Shri Swami Samarth यांच्या दर्शनासाठी अक्कलकोट नगरीत भाविकांची मोठी गर्दी होत असून, उन्हाळ्याच्या सुट्ट्यांमुळे विशेषतः Pune आणि Mumbai येथील स्वामी भक्त मोठ्या संख्येने अक्कलकोटकडे धाव घेत असल्याचे चित्र सध्या पाहायला मिळत आहे. मे महिन्यातील सुट्ट्यांमुळे मंदिर परिसर भक्तिमय वातावरणाने फुलून गेला असून राज्याच्या विविध भागांतून भाविक मोठ्या श्रद्धेने दर्शनासाठी येत आहेत.
नोकरी, व्यवसाय आणि दैनंदिन धावपळीमुळे वर्षातून एकदाच दर्शनासाठी येणाऱ्या अनेक कुटुंबांनी यंदा अक्कलकोट दर्शनाचा बेत आखला आहे. लहान मुलांपासून ज्येष्ठ नागरिकांपर्यंत सर्वजण मोठ्या भक्तिभावाने दर्शन घेताना दिसत आहेत. अक्कलकोट येथील स्वामी समर्थ मंदिर, वटवृक्ष मंदिर आणि समाधी मठ परिसरात पहाटेपासून रात्री उशिरापर्यंत भक्तांच्या रांगा लागलेल्या आहेत. “श्री स्वामी समर्थ” या नामघोषाने संपूर्ण परिसर भक्तिमय झाला असून भाविक आरती, महाप्रसाद आणि विविध धार्मिक कार्यक्रमांमध्ये सहभागी होत आहेत.
भाविकांच्या वाढत्या संख्येमुळे वाहतूक व्यवस्थेवरही ताण जाणवत आहे. पुणे आणि मुंबईहून येणाऱ्या रेल्वे गाड्या तसेच एसटी बसमध्ये मोठी गर्दी होत असून अनेक गाड्या पूर्ण क्षमतेने भरून येत आहेत. खासगी वाहनांमधूनही अनेक कुटुंबे अक्कलकोटकडे रवाना होत असल्याने रेल्वे स्थानक आणि बस स्थानक परिसरात मोठी वर्दळ दिसून येत आहे.
शहरातील हॉटेल्स, लॉज, भोजनालये आणि प्रसाद विक्री केंद्रांनाही या धार्मिक गर्दीचा मोठा फायदा होत आहे. स्थानिक व्यापाऱ्यांमध्ये समाधानाचे वातावरण असून धार्मिक पर्यटनामुळे अक्कलकोटच्या अर्थचक्रालाही चालना मिळत असल्याचे बोलले जात आहे. मंदिर परिसरात भक्तांच्या सोयीसाठी पिण्याचे पाणी, सुरक्षा, वाहतूक नियंत्रण आणि स्वच्छतेवर प्रशासनाकडून विशेष लक्ष दिले जात आहे.
“भिऊ नकोस, मी तुझ्या पाठीशी आहे” या स्वामी समर्थांच्या संदेशाने प्रेरित होऊन हजारो भक्त अक्कलकोटमध्ये येऊन आध्यात्मिक समाधान अनुभवत आहेत. उन्हाळ्याच्या सुट्ट्यांमुळे पुढील काही दिवस भाविकांची संख्या आणखी वाढण्याची शक्यता व्यक्त केली जात आहे.
