सैनिक स्कूल विद्यार्थ्यांसाठी शिक्षण आणि शिस्त यांचा दुहेरी संगम – पोलीस अधीक्षक नवनीत कॉवत

योगेश्वरी सैनिक स्कूलचा प्रवेशोत्सव उत्साहात संपन्न

अंबाजोगाई | प्रतिनिधी

अंबाजोगाई येथील योगेश्वरी शिक्षण संस्था संचलित योगेश्वरी सैनिक स्कूलचा प्रवेशोत्सव कार्यक्रम सोमवारी उत्साहपूर्ण वातावरणात संपन्न झाला. कार्यक्रमाच्या अध्यक्षस्थानी योगेश्वरी शिक्षण संस्थेचे माजी अध्यक्ष तथा मार्गदर्शक डॉ. सुरेश खुरसाळे हे होते. प्रमुख पाहुणे म्हणून बीड जिल्ह्याचे पोलीस अधीक्षक नवनीत कॉवत उपस्थित होते. तसेच विशेष निमंत्रित म्हणून अंबाजोगाईचे उपजिल्हाधिकारी दीपक वजाळे आणि सैनिकी कल्याण विभागाचे उपसंचालक कर्नल सतीश हंगे उपस्थित होते.

योगेश्वरी शिक्षण संस्थेच्या सैनिक स्कूलची या शैक्षणिक वर्षापासून सुरुवात झाली असून इयत्ता सहावीच्या पहिल्या तुकडीचा प्रवेशोत्सव ढोल-ताशांच्या गजरात, पारंपरिक हलगीच्या नादात आणि मुलींच्या ढोल पथकाच्या वादनात उत्साहात पार पडला.

यावेळी मार्गदर्शन करताना पोलीस अधीक्षक नवनीत कॉवत म्हणाले की, “मी स्वतः सहावीपासून सैनिकी शाळेत शिक्षण घेतले आहे. सैनिक स्कूलमध्ये शिक्षणासोबत शिस्तीचे धडे दिले जातात. विद्यार्थ्यांमध्ये स्वावलंबन, आत्मविश्वास आणि देशसेवेची भावना निर्माण करण्यासाठी शिस्त अत्यंत महत्त्वाची असते. शिक्षण आणि शिस्त यांचा संगम विद्यार्थ्यांना सजग नागरिक बनवतो. आज विद्यार्थ्यांना सोडण्यासाठी आलेल्या पालकांना पाहून मला माझ्या सैनिकी शाळेतील पहिल्या दिवसाची आठवण झाली. त्याच शिस्तीमुळे मी आयपीएस अधिकारी बनू शकलो, याचा मला अभिमान आहे. विद्यार्थ्यांनीही देशसेवेसाठी स्वतःला समर्पित करावे,” असा संदेश त्यांनी दिला.

कार्यक्रमात बोलताना योगेश्वरी शिक्षण संस्थेचे मार्गदर्शक डॉ. सुरेश खुरसाळे म्हणाले की, “१९१७ साली लोकमान्य टिळकांच्या राष्ट्रीय शिक्षणाच्या चतुःसूत्री कार्यक्रमातून योगेश्वरी शिक्षण संस्थेची स्थापना झाली. देशभक्तीची भावना जपत संस्थेने अनेक वर्षे कार्य केले आहे. गेल्या चार वर्षांपासून संरक्षण मंत्रालयाकडे केलेल्या पाठपुराव्यानंतर आणि विविध तपासणीनंतर सैनिक स्कूलला मान्यता मिळाली. आजचा प्रवेशोत्सव हा संस्थेसाठी अभिमानाचा क्षण आहे.”

संस्थेचे अध्यक्ष चंद्रशेखर बर्दापूरकर यांनी प्रास्ताविकात विद्यार्थ्यांनी या सैनिक स्कूलमधून शिक्षण घेऊन देशसेवेत योगदान द्यावे, असे मत व्यक्त केले.

सैनिक स्कूलचे प्राचार्य मेजर एस. पी. कुलकर्णी यांनी प्रास्ताविक करत विद्यार्थ्यांकडून देशसेवेची प्रतिज्ञा म्हणवून घेतली. कार्यक्रमाचे आभार प्रदर्शन संस्थेचे सचिव कमलाकर चौसाळकर यांनी केले.

या कार्यक्रमास योगेश्वरी शिक्षण संस्थेचे पदाधिकारी, संचालक, अंबाजोगाईतील प्रतिष्ठित नागरिक, शिक्षक, शिक्षकेतर कर्मचारी तसेच नव्याने प्रवेश घेतलेल्या विद्यार्थ्यांचे पालक मोठ्या संख्येने उपस्थित होते. कार्यक्रमाच्या यशस्वीतेसाठी योगेश्वरी सैनिक स्कूलच्या शिक्षक व शिक्षकेतर कर्मचाऱ्यांनी विशेष परिश्रम घेतले.