शिर्डी | प्रतिनिधी
लग्नाचे आमिष दाखवून एका ३३ वर्षीय परिचारिकेची आर्थिक व मानसिक फसवणूक केल्याची धक्कादायक घटना शिर्डीत उघडकीस आली आहे. आरोपीने पीडित महिलेकडून तब्बल १३ लाख रुपये रोख रक्कम आणि ३ तोळे सोन्याचे दागिने घेऊन लग्नास नकार दिल्याने या प्रकरणाची परिसरात मोठी चर्चा सुरू आहे. याप्रकरणी शिर्डी पोलीस ठाण्यात गुन्हा दाखल करण्यात आला असून पोलीस पुढील तपास करत आहेत.
मिळालेल्या माहितीनुसार, पीडित महिला शिर्डी येथील एका खासगी रुग्णालयात परिचारिका म्हणून कार्यरत आहे. जून २०२१ मध्ये तिची ओळख जालना जिल्ह्यातील आवलगाव येथील रहिवासी दादाराव रामोजी भांगे याच्याशी झाली होती. ओळखीचे रूपांतर मैत्रीत झाले आणि आरोपीने लग्नाचे आश्वासन देत तिचा विश्वास संपादन केला.
तक्रारीनुसार, जून २०२१ ते जून २०२६ या कालावधीत आरोपीने विविध कारणे सांगून पीडित महिलेकडून वेळोवेळी १३ लाख रुपये रोख तसेच ३ तोळे सोन्याचे दागिने घेतले. मात्र, महिलेकडून लग्नासाठी आग्रह धरल्यानंतर आरोपीने टाळाटाळ सुरू केली. अखेरीस त्याने लग्नास नकार देत घेतलेली रक्कम व दागिने परत करण्यासही नकार दिल्याचा आरोप करण्यात आला आहे.
आपली फसवणूक झाल्याचे लक्षात आल्यानंतर संबंधित महिलेने शिर्डी पोलीस ठाण्यात धाव घेत तक्रार दाखल केली. महिलेच्या तक्रारीवरून पोलिसांनी आरोपी दादाराव रामोजी भांगे याच्याविरुद्ध संबंधित कलमान्वये गुन्हा दाखल केला आहे.
या प्रकरणाचा पुढील तपास पोलीस उपनिरीक्षक सागर काळे हे करीत आहेत.
