मारेगाव | प्रतिनिधी
मारेगाव पोलीस स्टेशन अंतर्गत येणाऱ्या मार्डा सर्कलमधील दांडगाव-मार्डा डॅम परिसरात काही दिवसांपूर्वी एका ४५ ते ५० वर्षीय अज्ञात इसमाचा मृतदेह आढळून आला होता. या घटनेमुळे परिसरात खळबळ उडाली होती. सुरुवातीला मृत्यूचे कारण अस्पष्ट असताना मारेगाव पोलिसांनी तातडीने तपासाची सूत्रे हाती घेत अवघ्या २४ तासांत हा मृत्यू नसून खून असल्याचे स्पष्ट केले.
या प्रकरणाचा तपास करताना मारेगाव पोलीस आणि शिरपूर पोलीस यांनी संयुक्तपणे दोन पथके तयार करून तपासाला गती दिली. तपासादरम्यान मृत व्यक्तीची ओळख पटवून खून प्रकरणातील तीन आरोपींना पोलिसांनी ताब्यात घेतले होते. पोलिसांच्या तपासात या खून प्रकरणात एकूण पाच जणांचा सहभाग असल्याचे निष्पन्न झाले होते. मात्र त्यावेळी दोन आरोपी फरार होते.
दरम्यान, तत्कालीन पोलीस निरीक्षक श्याम वानखेडे यांच्या कार्यकाळात या प्रकरणाचा तपास सुरू होता. त्यांच्या बदलीनंतर नव्याने तपासाची दिशा ठरवून पोलीस निरीक्षक सागर दानडे यांच्या मार्गदर्शनाखाली पोलिसांनी उर्वरित दोन आरोपींनाही अटक करण्यात यश मिळवले.
अटक करण्यात आलेल्या आरोपींमध्ये प्रशांत पंढरी घागी आणि सुनील निकोडे यांचा समावेश आहे. दोन्ही आरोपींना मारेगाव पोलिसांनी ताब्यात घेऊन न्यायालयासमोर हजर केले असून त्यानंतर त्यांना यवतमाळ कारागृहात पाठविण्यात आले आहे.
या कारवाईत पोलीस उपनिरीक्षक प्रमोद जिद्देवार यांच्यासह दिगंबर किनाके, सागर दिपेवार, शंकर बारेकर, संभा लेनगुडे आदी पोलीस कर्मचाऱ्यांनी महत्त्वाची भूमिका बजावली. पोलिसांच्या या धडक कारवाईमुळे मारेगाव परिसरात पोलिसांच्या कार्यक्षमतेचे कौतुक होत आहे.
