पाथरी ( प्रतिनिधी )
परमपूज्य साईबाबा जन्मस्थान मंदिर, पाथरी येथे नाट्यशास्त्राच्या अभ्यासक तथा संशोधक डॉ. योगिता महाजन तळेकर यांचा मंदिर व्यवस्थापन मंडळाच्या वतीने हृद्य सत्कार करण्यात आला. जागतिक स्तरावर भारतीय रंगभूमी व नाट्यशास्त्राचा गौरव वाढविल्याबद्दल त्यांना शाल, श्रीफळ, साईबाबांची विभूती तसेच साईबाबांच्या घराची प्रतिमा देऊन सन्मानित करण्यात आले. हा सत्कार सौ. नीलिमा भुसारी यांच्या शुभहस्ते संपन्न झाला.
डॉ. योगिता महाजन तळेकर यांनी नुकतेच लंडन येथे आयोजित जागतिक परिषदेत भारताचे प्रतिनिधित्व करत भारतीय रंगभूमी व नाट्यशास्त्रावर प्रभावी सादरीकरण केले. या परिषदेत जगातील तब्बल ६८ देशांतील प्रतिनिधींनी सहभाग नोंदविला होता. त्यांच्या या उल्लेखनीय कार्यामुळे पाथरीच्या शैक्षणिक, सांस्कृतिक व बौद्धिक क्षेत्राचा जागतिक स्तरावर गौरव झाला असून, पाथरीकरांसाठी ही अभिमानाची बाब असल्याची भावना उपस्थितांनी व्यक्त केली.
यावेळी बोलताना डॉ. योगिता महाजन तळेकर म्हणाल्या की, “भरतमुनी आणि तत्कालीन महापुरुषांनी निर्माण केलेले नाट्यशास्त्र अत्यंत समृद्ध असून, ज्या वैज्ञानिक पद्धतीने त्याची रचना करण्यात आली आहे, तसे उदाहरण जगातील अन्य कोणत्याही देशात आढळत नाही.” भारतीय संस्कृती, नाट्यपरंपरा आणि अभिनयशास्त्राची वैशिष्ट्ये त्यांनी यावेळी उपस्थितांसमोर उलगडून सांगितली.
या कार्यक्रमास ट्रस्टचे सचिव तथा व्यवस्थापकीय विश्वस्त अॅड. अतुल दिनकरराव चौधरी, विश्वस्त संजय भुसारी, ज्येष्ठ विधीज्ञ बाळासाहेब तळेकर व त्यांच्या सुविद्य पत्नी, मुख्य कार्यकारी अधिकारी नारायण कुलकर्णी, सौ. शिवकन्या नागठाणे, संभाजीनगर येथील साईभक्त सराफ बल्लाळ परिवार, अजय पाथरीकर, योगेश इनामदार, बालाजी बेदरे, प्रभाकर पाटील तसेच मोठ्या संख्येने साईभक्त उपस्थित होते.
कार्यक्रमात उपस्थित मान्यवरांनी डॉ. योगिता महाजन तळेकर यांच्या कार्याचे कौतुक करत, त्यांनी भारतीय संस्कृतीचा जागतिक पातळीवर उंचावलेला मान हा सर्वांसाठी प्रेरणादायी असल्याचे सांगितले.
