देवळा | प्रतिनिधी
देवळा तालुक्यातील भऊर फाटा परिसरात कौटुंबिक वादातून मेव्हण्याने सालीचा चाकूने भोसकून खून केल्याची धक्कादायक घटना शुक्रवारी (दि. २२ मे) घडली. या घटनेनंतर पसार झालेल्या आरोपीला खामखेडा येथील सरपंच अॅड. वैभव पवार आणि ग्रामस्थांच्या सतर्कतेमुळे पकडण्यात यश आले आहे.
याप्रकरणी मयत महिलेचे पती ज्ञानेश्वर सुरेश जाधव (वय ४१, रा. कॉलेज रोड, अहिल्यादेवी नगर, निफाड) यांनी देवळा पोलीस ठाणे येथे फिर्याद दाखल केली आहे.
पोलिसांनी दिलेल्या माहितीनुसार, फिर्यादी यांच्या पत्नी छाया ज्ञानेश्वर जाधव यांच्या बहिणीचा विवाह श्याम आगनदास माळी (रा. धोडांबे, ता. चांदवड) याच्यासोबत झाला होता. श्याम माळी हा भऊर फाटा परिसरात मजुरी करत वास्तव्यास होता. दारूच्या व्यसनासाठी पत्नी मायाकडून पैसे मागणे आणि त्यातून होणारे वाद यामुळे कुटुंबात सतत तणाव निर्माण होत होता.
माया हिला होणाऱ्या मारहाणीमुळे ती २१ मे रोजी माहेरी निफाड येथे आली होती. त्यावेळी छाया जाधव यांनी पतीला फोन करून आरोपीने “देवळ्याला या, डायरेक्ट चिरून टाकतो,” अशी धमकी दिल्याचे सांगितले होते.
यानंतर ज्ञानेश्वर जाधव, पत्नी छाया, सासू ताईबाई, साला सोनू कराटे व इतर नातेवाईक शुक्रवारी सकाळी आरोपीची समजूत काढण्यासाठी भऊर फाटा येथे गेले होते. त्यावेळी आरोपी श्याम माळी हा त्याच्या पुतण्यासह मोटारसायकलवर घटनास्थळी आला.
सुरुवातीला बोलणी सुरू असताना आरोपीने अचानक चाकू काढून माया हिला मारण्याचा प्रयत्न केला. मात्र सोनू कराटे यांनी तिला मागे ओढल्याने वार चुकला. त्यानंतर आरोपीने “तू कायम आमच्या नवरा-बायकोमध्ये येते,” असे म्हणत छाया जाधव यांच्या छातीवर चाकूने वार केला. गंभीर जखमी झालेल्या छाया जाधव यांना तातडीने ग्रामीण रुग्णालयात दाखल करण्यात आले, मात्र डॉक्टरांनी त्यांना मृत घोषित केले. भांडण सोडविताना सोनू कराटे यांच्या हातांनाही दुखापत झाली.
घटनेनंतर आरोपी घटनास्थळावरून पसार झाला होता. पोलिसांना आरोपी पिळकोस-खामखेडा-सावकी परिसरात असल्याची माहिती मिळाल्यानंतर वैभव पवार यांना याबाबत कळविण्यात आले. त्यानंतर वैभव पवार व ग्रामस्थांनी शोधमोहीम राबवत आरोपीचा पाठलाग करून त्याला पकडले आणि पोलिसांच्या ताब्यात दिले.
या कारवाईत सोनू शेवाळे, माणिक शेवाळे, सचिन शेवाळे, रोशन शेवाळे, अमोल बिरारी, वकील शेवाळे आणि सौरभ शेवाळे यांनीही मदत केली.
या प्रकरणाचा पुढील तपास सार्थक नेहेते यांच्या मार्गदर्शनाखाली सुरू असून आरोपीविरुद्ध खुनाचा गुन्हा दाखल करण्याची प्रक्रिया सुरू आहे.
