प्रतिनिधी
Sharad Pawar यांनी एक मोठा निर्णय घेत नातू आणि आमदार Rohit Pawar यांच्यावर महत्त्वाची जबाबदारी सोपवली आहे. रयत शिक्षण संस्थेच्या उत्तर विभागीय अध्यक्षपदी रोहित पवार यांची निवड करण्यात आली असून, जवळपास सहा वर्षे सदस्य म्हणून काम केल्यानंतर त्यांना ही जबाबदारी देण्यात आली आहे.
राष्ट्रवादी काँग्रेस पक्षात सध्या राजकीय घडामोडींना वेग आला आहे. काही दिवसांपूर्वी अजित पवार गटाचे नेते Sunil Tatkare आणि Praful Patel यांनी शरद पवार यांची भेट घेतली होती. या भेटीनंतर पक्षात विविध चर्चांना उधाण आले होते. रोहित पवार नाराज असल्याच्या चर्चाही रंगल्या होत्या. मात्र, या सर्व चर्चांदरम्यान शरद पवार यांनी रोहित पवारांवर मोठी जबाबदारी टाकत त्यांच्यावरील विश्वास पुन्हा अधोरेखित केला आहे.
निवडीनंतर रोहित पवार यांनी सोशल मीडियावर पोस्ट करत आनंद व्यक्त केला. त्यांनी म्हटले की, “बहुजन समाजाच्या मुला-मुलींना शिक्षणाच्या प्रवाहात आणण्यासाठी कर्मवीर भाऊराव पाटील यांनी स्थापन केलेल्या आणि आज आदरणीय पवार साहेबांच्या नेतृत्वाखाली कार्यरत असलेल्या रयत शिक्षण संस्थेच्या उत्तर विभागीय अध्यक्षपदी निवड झाल्याबद्दल मनापासून आभार. गेल्या सहा वर्षांत सदस्य म्हणून केलेल्या कामाची ही पोचपावती आहे.”
Rayat Shikshan Sanstha या संस्थेच्या अध्यक्षपदी सन 2026 ते 2029 या कालावधीसाठी शरद पवार यांची पुन्हा एकदा बिनविरोध निवड झाली आहे. अध्यक्षपदासाठी केवळ त्यांचाच अर्ज आल्याने ही निवड निश्चित झाली.
निवडीनंतर बोलताना शरद पवार यांनी संस्थेच्या भावी वाटचालीबाबत महत्त्वाचे संकेत दिले. कृत्रिम बुद्धिमत्ता (AI) तंत्रज्ञानाचा स्वीकार करून रयत शिक्षण संस्थेला जागतिक स्तरावर अग्रस्थानी नेण्याचा मानस त्यांनी व्यक्त केला. तसेच परदेशातील नामांकित शैक्षणिक संस्थांशी सहकार्य वाढवून विद्यार्थ्यांना अधिक गुणवत्तापूर्ण शिक्षण उपलब्ध करून देण्याचा प्रयत्न केला जाणार असल्याचे त्यांनी सांगितले.
विद्यार्थ्यांना मोठ्या प्रमाणावर शिष्यवृत्ती देण्याचाही निर्णय यंदा घेण्यात येणार असून, संस्थेला मिळालेल्या देणगीमुळे नाविन्यपूर्ण बदल घडवून आणण्यावर भर दिला जाणार असल्याचेही शरद पवार यांनी स्पष्ट केले.
