सामाजिक बांधिलकी जोपासत पुरस्कार वितरण सोहळा उत्साहात
अंबाजोगाई | प्रतिनिधी
रोटरी क्लब ऑफ मनोहर अंबाजोगाई यांच्या वतीने आयोजित पुरस्कार वितरण सोहळा आणि प्रांतपाल भेट कार्यक्रम उत्साहपूर्ण वातावरणात पार पडला. या कार्यक्रमात विविध क्षेत्रात उल्लेखनीय कार्य करणाऱ्या महिला व युवतींचा सन्मान करण्यात आला.
अंबाजोगाई येथील टी. बी. गिरवलकर अभियांत्रिकी महाविद्यालय येथे दि. २१ मे २०२६ रोजी आयोजित कार्यक्रमास रोटरी डिस्ट्रिक्ट ३१३२ चे प्रांतपाल सुधीर लातुरे यांनी अधिकृत भेट देत क्लबच्या कार्याचा आढावा घेतला.
यावेळी फर्स्ट लेडी संगीता लातुरे, उपप्रांतपाल डॉ. गिरीश कुलकर्णी, डॉ. तापडिया, क्लबचे अध्यक्ष भिमाशंकर न. शिंदे तसेच सचिव सुनील व्यवहारे यांची प्रमुख उपस्थिती होती.
कार्यक्रमाच्या प्रारंभी मान्यवरांचे स्वागत करण्यात आले. प्रास्ताविकात भिमाशंकर न. शिंदे यांनी रोटरीच्या माध्यमातून अंबाजोगाई परिसरात समाजोपयोगी उपक्रम राबविण्याचा संकल्प व्यक्त केला. “जिथे कमी तिथे आम्ही” ही भावना जपत सामाजिक कार्य अधिक व्यापक करण्याचा मानस त्यांनी व्यक्त केला.
उपप्रांतपाल डॉ. गिरीश कुलकर्णी यांनी क्लबच्या कार्याचे कौतुक करत नव्या नेतृत्वातून रोटरीला नवी दिशा मिळेल, असा विश्वास व्यक्त केला.
अध्यक्षीय समारोपात सुधीर लातुरे यांनी अवघ्या आठ महिन्यांत क्लबने समाजातील गरजूं पर्यंत पोहोचून उल्लेखनीय काम केल्याचे सांगितले. “हा क्लब भविष्यात जिल्ह्यात वेगळी ओळख निर्माण करेल,” असा विश्वास त्यांनी व्यक्त केला.
यावेळी ईशा जोशी यांना “रोटरी आत्मनिर्भर पुरस्कार” तर दिपाली जाधव आणि रमेश सोमवंशी या दांपत्याला “रोटरी सक्षम पुरस्कार” प्रदान करण्यात आला.
तसेच स्वर्गीय संजय गिरी यांच्या पत्नी अर्चना गिरी यांना उदरनिर्वाहासाठी पिको फॉल मशीन देऊन सामाजिक बांधिलकी जपण्यात आली.
कार्यक्रमाची सुरुवात रोटरीचे संस्थापक पॉल हॅरिस यांच्या प्रतिमेचे पूजन व दीपप्रज्वलनाने करण्यात आली. सूत्रसंचालन गणेश तौर यांनी केले, तर आभार प्रदर्शन सुनील व्यवहारे यांनी मानले.
या कार्यक्रमाला सामाजिक, शैक्षणिक, वैद्यकीय, पत्रकारिता, सांस्कृतिक आणि विविध क्षेत्रातील मान्यवर मोठ्या संख्येने उपस्थित होते.
