भडगाव | प्रतिनिधी
आगामी पावसाळ्याच्या पार्श्वभूमीवर शहरात पाणी तुंबणे, सांडपाण्याचा अडथळा तसेच पूरस्थिती निर्माण होऊ नये यासाठी भडगाव नगरपरिषदेकडून मान्सूनपूर्व नाले व ड्रेनेज सफाई मोहिमेला वेग देण्यात आला आहे. दि. २० मेपासून सुरू करण्यात आलेल्या या विशेष मोहिमेंतर्गत शहरातील विविध भागांमध्ये नालेसफाई, ड्रेनेज साफसफाई तसेच रस्त्यालगत वाढलेले गवत, झाडे-झुडपे आणि मातीचे ढिगारे हटविण्याची कामे युद्धपातळीवर सुरू आहेत.
मोहिमेची सुरुवात बाळद रोड परिसरातील ड्रेनेज सफाईने करण्यात आली असून जेसीबीच्या सहाय्याने मोठ्या प्रमाणावर गाळ व कचरा हटविण्यात येत आहे. मागील पावसाळ्यात नागरिकांना आलेल्या अडचणी लक्षात घेऊन यंदा सर्व प्रमुख नाले व पाण्याचा विसर्ग होणाऱ्या मार्गांची व्यापक साफसफाई करण्याचा निर्णय नगरपरिषदेकडून घेण्यात आला आहे.
३ जूनपर्यंत विशेष स्वच्छता मोहीम
नगरपरिषदेच्या नियोजनानुसार बाळद रोड, तळणी ते बाळद रोड, जयकिसान कॉलनी, दत्तनगर, जयहिंद कॉलनी, शिवशक्ती कॉलनी, पोलीस लाईन, एच कॉलनी, गणपती मंदिर ते सिव्हील हॉस्पिटल परिसर, कोल्हा नाला, ग्रीन पार्क कॉलनी, न्यायालय परिसर, भागवत कॉलनी आदी भागांमध्ये नालेसफाईचे वेळापत्रक निश्चित करण्यात आले आहे.
दि. २० मे ते ३ जूनदरम्यान ही मोहीम सातत्याने राबविण्यात येणार असून पुढील १५ ते २० दिवस शहरभर जेसीबी व मनुष्यबळाच्या सहाय्याने स्वच्छता मोहीम सुरू राहणार आहे.
ही मोहीम लोकनियुक्त नगराध्यक्षा रेखाताई मालचे यांच्या मार्गदर्शनाखाली राबविण्यात येत असून उपनगराध्यक्ष राजेंद्र पाटील, गटनेते लखीचंद पाटील, आरोग्य सभापती इम्रान अली सय्यद तसेच विविध प्रभागांतील नगरसेवकांनी सहकार्य केले आहे.
नगरपरिषदेचे मुख्याधिकारी मंगेश देवरे, आरोग्य विभागाचे इंजि. सत्यम पाटील, श्रीमती निशा लोट व क्लार्क छोटू वैद्य यांनी प्रभागनिहाय नियोजन करून मोहिमेची अंमलबजावणी सुरू केली आहे.
शहरातील कोल्हा नाला, ग्रीन पार्क नाला, टोणगाव नाला तसेच शिवनेरी गेट परिसरातील नाल्यांचीही व्यापक साफसफाई करण्यात येणार आहे. या मोहिमेमुळे पावसाळ्यातील संभाव्य अडचणी टाळण्यास मदत होणार असून नागरिकांनी प्रशासनास सहकार्य करावे, असे आवाहन नगरपरिषदेकडून करण्यात आले आहे.
