प्रतिनिधी | पाचोरा-भडगाव
महाराष्ट्र विधान परिषद निवडणुकीच्या पार्श्वभूमीवर राज्यातील राजकीय हालचालींना वेग आला असून जळगाव जिल्ह्यातील पाचोरा-भडगाव मतदारसंघातून भाजपाचे युवा नेते अमोल भाऊ शिंदे यांचे नाव चर्चेत आले आहे.
जळगाव जिल्हा विधान परिषद जागा गेल्या अनेक वर्षांपासून भाजपाच्या ताब्यात असून स्थानिक स्वराज्य संस्थांमध्ये भाजपाचे संख्याबळ मजबूत मानले जाते. त्यामुळे ही जागा पुन्हा भाजपाकडेच राहण्याची शक्यता व्यक्त केली जात आहे. मात्र मित्रपक्ष शिवसेना शिंदे गटाकडूनही या जागेवर दावा करण्यात येत आहे.
दरम्यान, पालकमंत्री गुलाबराव पाटील तसेच आमदार किशोर पाटील यांच्या कुटुंबीयांच्या नावांची चर्चा सुरू असताना काही तांत्रिक अडचणींमुळे समीकरणे बदलत असल्याचे बोलले जात आहे. अशा परिस्थितीत भाजपातील निष्ठावंत आणि तळागाळाशी संपर्क असलेले नेतृत्व म्हणून अमोल भाऊ शिंदे यांचे नाव पुढे येत आहे.
मागील विधानसभा निवडणुकीत युतीतील जागावाटपामुळे भाजपाकडून उमेदवारी न मिळाल्याने अमोल शिंदे यांनी अपक्ष उमेदवार म्हणून निवडणूक लढवली होती. त्या वेळी त्यांनी दिलेली लढत मतदारसंघात चर्चेचा विषय ठरली होती. पराभव झाला असला तरी त्यांच्या जनाधाराची ताकद अधोरेखित झाल्याचे राजकीय विश्लेषकांचे मत आहे.
भाजपाचे ज्येष्ठ नेते व मंत्री गिरीश महाजन यांचे निकटवर्तीय म्हणून ओळख असलेल्या अमोल शिंदे यांनी युवक, शेतकरी, बेरोजगारी, ग्रामीण विकास आणि सामाजिक प्रश्नांवर सातत्याने भूमिका घेतल्याचे सांगितले जाते.
“फक्त घराणेशाहीच का? तळागाळातील कार्यकर्त्यांनाही संधी मिळायला हवी,” अशी भावना स्थानिक कार्यकर्त्यांकडून व्यक्त केली जात आहे. बदलत्या राजकीय परिस्थितीत अभ्यासू, संघर्षशील आणि विकासाभिमुख नेतृत्वाला संधी देण्याची गरज व्यक्त होत असून अमोल शिंदे यांना संधी मिळाल्यास भाजपाला राजकीयदृष्ट्या फायदा होऊ शकतो, अशी चर्चा राजकीय वर्तुळात सुरू आहे.
