कोल्हापूर | प्रतिनिधी
कोल्हापूर जिल्हा सहकारी दूध उत्पादक संघ मर्यादित (गोकुळ) या ‘अ’ वर्ग सहकारी संस्थेच्या संचालक मंडळाच्या २०२६ ते २०३१ या पंचवार्षिक कालावधीसाठी होणाऱ्या निवडणुकीची प्रक्रिया अधिकृतपणे सुरू झाली आहे. प्रादेशिक दुग्धव्यवसाय विकास अधिकारी तथा जिल्हा सहकारी निवडणूक अधिकारी (दुग्ध), पुणे विभाग यांनी मतदार यादी निश्चितीचा कालबद्ध कार्यक्रम जाहीर केला आहे.
या निवडणुकीसाठी ०४ मे २०२६ ही अर्हता दिनांक (पात्रता तारीख) निश्चित करण्यात आली आहे.
मतदार यादी निश्चिती कार्यक्रम
गोकुळच्या निवडणूक प्रक्रियेत पहिल्या टप्प्यात मतदार यादी तयार करण्यासाठी खालील वेळापत्रक जाहीर करण्यात आले आहे—
१) प्राथमिक दूध संस्थांना पत्र पाठविणे :
गोकुळशी संलग्न प्राथमिक सहकारी दूध संस्थांकडून मतदार यादीसाठी आवश्यक माहिती मागविण्यासाठी २६ मे २०२६ ते ०१ जून २०२६ या कालावधीत पत्रव्यवहार केला जाणार आहे.
२) ठराव सादर करण्याची मुदत :
संस्थांनी प्रतिनिधी नियुक्तीबाबतचे ठराव ०२ जून २०२६ ते ०१ जुलै २०२६ या कालावधीत संबंधित निवडणूक अधिकाऱ्यांकडे सादर करायचे आहेत.
कार्यालयीन व्यवस्था
निवडणूक प्रक्रियेसाठी जिल्हा सहकारी निवडणूक अधिकारी (दुग्ध), पुणे विभाग यांचे तात्पुरते कार्यालय कोल्हापूर येथील सहाय्यक निबंधक (दुग्ध) कार्यालय, ताराबाई पार्क येथे कार्यरत राहणार आहे.
अधिक माहितीसाठी ०२३१-२६५१७२४ या क्रमांकावर किंवा dddokpr@gmail.com वर संपर्क साधता येईल.
हा परिपत्रक २५ मे २०२६ रोजी जिल्हा सहकारी निवडणूक अधिकारी राजकुमार पाटील यांच्या स्वाक्षरीने प्रसिद्ध करण्यात आला आहे. गोकुळच्या निवडणूक प्रक्रियेच्या सुरुवातीमुळे कोल्हापूरच्या सहकार आणि राजकीय वर्तुळात हालचालींना वेग आला आहे.
