मारेगाव | प्रतिनिधी :
मारेगाव शहरातील धामणी रोडवरील एचपी गॅस एजन्सीसमोर गॅस सिलिंडरसाठी नागरिकांची मोठी गर्दी होत असून गॅस पुरवठा अपुरा असल्याने नागरिकांना तासनतास रांगेत उभे राहावे लागत आहे. त्यामुळे परिसरात असंतोषाचे वातावरण निर्माण झाले आहे.
तहसीलदारांच्या कारवाईनंतरही परिस्थिती जैसे थे
नागरिकांच्या म्हणण्यानुसार, गॅस तुटवड्याबाबत यापूर्वी तहसीलदारांनी एजन्सीवर कारवाई केली होती. मात्र त्यानंतरही परिस्थितीत सुधारणा झालेली नाही. त्यामुळे आजही नागरिकांना उन्हात उभे राहून सिलिंडरसाठी प्रतीक्षा करावी लागत आहे.
नागरिकांशी उर्मट वागणुकीचा आरोप
गॅस वितरणासाठी आलेल्या नागरिकांनी कर्मचाऱ्यांकडे विचारणा केली असता त्यांच्याकडून उर्मट वागणूक मिळत असल्याचा आरोप करण्यात आला आहे. “गॅस हवा असेल तर थांबा, नाहीतर घरी जा” अशा प्रकारची भाषा वापरली जात असल्याचे नागरिकांचे म्हणणे आहे.
मूलभूत सुविधांचा अभाव
एजन्सी परिसरात नागरिकांसाठी पिण्याचे पाणी व स्वच्छतागृहाची कोणतीही सुविधा उपलब्ध नसल्याने नागरिकांना मोठा त्रास सहन करावा लागत आहे.
कारवाईची मागणी
गॅस पुरवठा सुरळीत करावा, नागरिकांशी योग्य वागणूक ठेवावी तसेच संबंधित एजन्सीवर तातडीने कारवाई करावी, अशी मागणी नागरिकांकडून करण्यात येत आहे. प्रशासनाने या गंभीर प्रश्नाची दखल घ्यावी, अशी अपेक्षा व्यक्त होत आहे.
