आजरा | प्रतिनिधी
आजरा येथील व्यंकटराव शिक्षण संकुलामध्ये प्राथमिक आरोग्य केंद्र वाटंगी व उपकेंद्र पारेवाडी यांच्या वतीने एच.पी.व्ही. (HPV) लसीकरणाबाबत मार्गदर्शन कार्यक्रमाचे आयोजन करण्यात आले. या कार्यक्रमात आरोग्य सेवक दीपक हरणे व आरोग्य सेविका सुचिता मॅडम यांनी शिक्षक, शिक्षिका, पालक व विद्यार्थिनींना मार्गदर्शन केले.
कार्यक्रमाची सुरुवात प्राचार्य एम. एम. नागुर्डेकर यांच्या स्वागतपर मनोगताने झाली. त्यांनी उपस्थित आरोग्य कर्मचाऱ्यांचे स्वागत केले.
कर्करोग प्रतिबंधासाठी लसीकरणाचे महत्त्व
आरोग्य सेविका सुचिता मॅडम यांनी मार्गदर्शन करताना सांगितले की, भारतामध्ये दररोज सुमारे 28 व्यक्ती कर्करोगामुळे मृत्यूमुखी पडतात. या पार्श्वभूमीवर 14 ते 15 वयोगटातील शालेय मुलींना एच.पी.व्ही. लस दिल्यास भविष्यात कर्करोगाचा धोका मोठ्या प्रमाणात कमी होऊ शकतो. ही लस शासनामार्फत प्राथमिक आरोग्य केंद्रांमध्ये मोफत उपलब्ध असल्याचेही त्यांनी स्पष्ट केले.
मुलींनी व पालकांनी अफवांवर विश्वास न ठेवता या लसीकरण मोहिमेत सहभागी व्हावे, असे आवाहनही त्यांनी केले.
पालक व शाळेचा सहभाग
प्राचार्य एम. एस. नागुर्डेकर यांनी शासनाच्या या मोफत लसीकरण उपक्रमाचे स्वागत करत हा उपक्रम आरोग्यदायी भविष्याच्या दृष्टीने अत्यंत महत्त्वाचा असल्याचे सांगितले. तसेच खाजगी दवाखान्यांमध्ये यासाठी मोठा खर्च येतो, त्यामुळे पालकांनी जागरूक राहून या योजनेचा लाभ घ्यावा, असे आवाहन त्यांनी केले.
कार्यक्रमाचे सूत्रसंचालन प्रा. पाटील-अर्दाळकर पी. जी. यांनी केले, तर आभार प्रदर्शन एम. ए. पाटील यांनी केले.
या कार्यक्रमास सीनियर कॉलेजचे प्र. प्राचार्य पन्हाळकर सर, सर्व शिक्षक, शिक्षकेतर कर्मचारी व पालक मोठ्या संख्येने उपस्थित होते.
