आजरा :
गर्भाशयाच्या मुखाच्या कर्करोगापासून मुलींचे संरक्षण करण्यासाठी केंद्र व राज्य शासनामार्फत राबविण्यात येणाऱ्या एचपीव्ही (HPV) लसीकरण मोहिमेअंतर्गत आजरा हायस्कूल येथे विशेष मार्गदर्शन कार्यक्रम संपन्न झाला. प्राथमिक आरोग्य केंद्र वाटंगी व उपकेंद्र पारेवाडी यांच्या संयुक्त विद्यमाने आयोजित या कार्यक्रमात शिक्षक, पालक व विद्यार्थिनींना लसीकरणाचे महत्त्व समजावून सांगण्यात आले.
कार्यक्रमाच्या प्रारंभी आजरा हायस्कूलचे मुख्याध्यापक श्री. ए. एल. तोडकर यांनी उपस्थित आरोग्य विभागाच्या कर्मचाऱ्यांचे स्वागत केले.
“कर्करोगाविषयी जनजागृती काळाची गरज”
उपकेंद्र पारेवाडी येथील आरोग्य सेविका सुचिता मॅडम यांनी मार्गदर्शन करताना कर्करोगाच्या वाढत्या धोक्याविषयी माहिती दिली. त्या म्हणाल्या की, भारतात दररोज अनेक नागरिक कर्करोगामुळे मृत्युमुखी पडत आहेत. त्यामुळे हा आजार होण्यापूर्वीच प्रतिबंधात्मक उपाय म्हणून १४ ते १५ वयोगटातील मुलींना एचपीव्ही लस देणे अत्यंत आवश्यक आहे.
त्यांनी स्पष्ट केले की, खासगी रुग्णालयांमध्ये ही लस अत्यंत महागडी असून शासनामार्फत प्राथमिक आरोग्य केंद्रांमध्ये ती मोफत उपलब्ध करून दिली जात आहे. त्यामुळे सोशल मीडियावरील अफवा किंवा चुकीच्या माहितीवर विश्वास न ठेवता पालकांनी आपल्या मुलींचे लसीकरण करून घ्यावे, असे आवाहन त्यांनी केले.
“शासनाची योजना मुलींसाठी सुरक्षा कवच” – मुख्याध्यापक तोडकर
मुख्याध्यापक श्री. ए. एल. तोडकर यांनी शासनाच्या या मोफत लसीकरण उपक्रमाचे स्वागत करत आरोग्य विभागाचे आभार मानले. खासगी दवाखान्यांमध्ये या लसीसाठी मोठा खर्च करावा लागतो. सर्वसामान्य कुटुंबांना तो परवडत नसल्याने शासनाची ही योजना मुलींच्या आरोग्यासाठी महत्त्वाचे सुरक्षा कवच ठरत असल्याचे त्यांनी सांगितले.
यावेळी आरोग्य सेवक दीपक हरणे, शिक्षक श्री. महेश केसरकर, सौ. मेघा पाटील, श्री. एस. जी. पाटील यांच्यासह शिक्षक, शिक्षकेतर कर्मचारी, पालक व विद्यार्थिनी मोठ्या संख्येने उपस्थित होत्या. कार्यक्रमानंतर आरोग्य विभागाच्या या जनजागृती मोहिमेचे उपस्थितांकडून कौतुक करण्यात आले.
