धाराशिव प्रतिनिधी :
पोलीस ठाणे येरमाळा हद्दीत पहाटेच्या सुमारास हायवेवरून जाणाऱ्या चालत्या ट्रकमधून अज्ञात चोरट्यांनी मेंढ्या चोरी करून नेल्याची घटना घडली होती. या प्रकरणाचा अवघ्या २४ तासांत छडा लावत स्थानिक गुन्हे शाखेने सुमारे २ लाख ९ हजार रुपये किमतीच्या मेंढ्या जप्त करत उल्लेखनीय कामगिरी केली आहे.
मा. पोलीस अधीक्षक श्रीमती रितु खोखर यांच्या मार्गदर्शनाखाली तसेच स्थानिक गुन्हे शाखेचे पोलीस निरीक्षक विनोद इज्जपवार यांच्या आदेशानुसार गुन्ह्याचा तपास सुरू करण्यात आला. त्यासाठी स्थानिक गुन्हे शाखा, RCP पथक क्रमांक १ आणि QRT पथक रवाना करण्यात आले.
तपासादरम्यान येरमाळा हायवेवरील पुलाजवळ पोलीस पथकाला गोपनीय माहिती मिळाली की, तेरखेडा येथील लक्ष्मी पारधी पिढी तसेच उमरा पारधी पिढी येथील काही इसमांनी चालत्या ट्रकमधून मेंढ्या चोरी करून आणल्या असून त्या उमरा पिढीजवळील बाभळीच्या झाडाखाली उभ्या असलेल्या लाल रंगाच्या टमटममध्ये ठेवण्यात आल्या आहेत.
ही माहिती मिळताच सपोनि तात्याराव भालेराव यांच्यासह पोलीस कर्मचारी घटनास्थळी दाखल झाले. तेथे पोलीस पथक पोहोचताच ७ ते ८ संशयित इसम पळून गेले. पोलिसांनी त्यांचा पाठलाग केला मात्र आरोपी हाती लागले नाहीत.
यानंतर पोलिसांनी लाल रंगाच्या टमटमची तपासणी केली असता त्यामध्ये चोरीच्या मेंढ्या आढळून आल्या. फिर्यादीला संपर्क करून मेंढ्यांचे वर्णन सांगितले असता त्या मेंढ्या ट्रकमधून चोरी झालेल्याच असल्याचे स्पष्ट झाले.
पोलीसांनी मेंढ्या व टमटम असा एकूण ३ लाख १९ हजार रुपयांचा मुद्देमाल जप्त करून पुढील कायदेशीर कारवाईसाठी येरमाळा पोलीस ठाण्यात जमा केला आहे.
ही कारवाई पोलीस अधीक्षक रितु खोखर यांच्या मार्गदर्शनाखाली स्थानिक गुन्हे शाखेचे पोलीस निरीक्षक विनोद इज्जपवार, सपोनि सचिन खटके, सपोनि तात्याराव भालेराव, पोलीस हवालदार विनोद जानराव, नितीन जाधवर, बबन जाधवर, महिला पोलीस हवालदार शोभा बांगर, पोलीस नाईक संतोष तिघाडे, संदीप चौघुले, रोहित दंडनाईक, तसेच RCP व QRT पथकाने संयुक्तरीत्या पार पाडली.
