उमरगा / प्रतिनिधी –
उमरगा येथील मलंग कॉम्प्लेक्स परिसरात घडलेल्या मारहाण प्रकरणात वंचित बहुजन आघाडीचे तालुकाध्यक्ष राम सैदा गायकवाड यांनी दाखल केलेला गुन्हा खोटा असल्याचा आरोप करत सामाजिक कार्यकर्त्या पंचशीला कांबळे व त्यांच्या सहकाऱ्यांनी तहसीलदारांकडे निवेदन सादर केले आहे.
दि. २२ मे रोजी सायंकाळी सहा वाजण्याच्या सुमारास मलंग कॉम्प्लेक्स येथील वंचितच्या कार्यालयात घुसून पंचशीला कांबळे, जयशंकर कांबळे आणि संघर्ष कांबळे यांनी चप्पल, लोखंडी रॉड व लाथाबुक्क्यांनी मारहाण केल्याची तक्रार राम गायकवाड यांनी पोलिसांत दिली होती. त्यानुसार तिघांविरोधात गुन्हा दाखल करण्यात आला होता.
मात्र, पंचशीला कांबळे यांनी तहसीलदारांना दिलेल्या निवेदनात वेगळीच भूमिका मांडली आहे. त्यांनी म्हटले आहे की, दि. २२ मे रोजी जयशंकर (विकी) कांबळे हे त्यांना घरी घेण्यासाठी कार्यालयाकडे आले होते. त्यावेळी राम गायकवाड यांनी त्यांना बोलावून बांधकाम कामगार कार्ड काढण्यासाठी तीन हजार रुपये लागतील असे सांगत आधार कार्ड व पॅन कार्डची मागणी केली.
जयशंकर कांबळे यांनी त्यावर अविश्वास व्यक्त करून नकार दिल्यानंतर राम गायकवाड संतप्त झाले आणि त्यांनी जयशंकर यांना कार्यालयात ओढून नेले. त्यानंतर फोनवरून शिवीगाळ झाल्याचे निवेदनात नमूद करण्यात आले आहे. पुढे वाद वाढल्यानंतर राम गायकवाड यांनी जयशंकर कांबळे यांच्यावर लोखंडी रॉडने हल्ला केल्याचा आरोप करण्यात आला आहे.
या घटनेनंतर जयशंकर कांबळे बाहेर पळत आले आणि स्वतःचा बचाव करण्यासाठी प्रतिकार केला, असेही निवेदनात म्हटले आहे. त्या वेळी पंचशीला कांबळे व संघर्ष कांबळे हे घटनास्थळी उपस्थित नसल्याचा दावा करण्यात आला आहे.
नंतर पंचशीला कांबळे यांनी राम गायकवाड यांना जाब विचारला असता त्यांनी दमदाटी केली, अश्लील भाषेत शिवीगाळ केली तसेच बदनामी करण्याची धमकी दिल्याचा आरोपही निवेदनात करण्यात आला आहे.
तसेच, तहसीलदारांना दिलेल्या दुसऱ्या निवेदनात एका महाविद्यालयीन तरुणीचे नाव नमूद करून तिचीही बदनामी करण्यात आल्याचा आरोप करण्यात आला आहे. सामाजिक कार्यकर्त्या म्हणून आपली मानहानी आणि मानसिक छळ झाल्याचे सांगत पंचशीला कांबळे यांनी राम गायकवाड यांच्यावर महिलांच्या चारित्र्यहननासंदर्भातील कायद्यानुसार कारवाई करण्याची मागणी प्रशासनाकडे केली आहे.
