श्रीरामपूर जि.अहिल्यानगर(प्रतिनिधी) : शेतकऱ्यांच्या नावाखाली श्रीरामपूर तालुक्यात डिझेलची मोठी साठेबाजी सुरू असून, अडलेल्या वाहनधारकांना चढ्या भावाने इंधन विकून काळाबाजार केला जात असल्याची चर्चा आहे. तालुक्यात सध्या सर्वच पेट्रोल पंपावर डिझेलची तीव्र टंचाई जाणवत असताना काही संधीसाधू घटकांनी या परिस्थितीचा गैरफायदा घेण्यास सुरुवात केली आहे.
कॅन किंवा बाटलीत डिझेल भरून त्याची अनधिकृत विक्री करणे हा ‘अत्यावश्यक वस्तू कायदा ‘ आणि पेट्रोलियम नियमांनुसार गंभीर गुन्हा मानला जातो मात्र तरीही ‘शेतीच्या मशागतीचे’ कारण पुढे करून अनेकजण शेकडो लिटर डिझेलचा बेकायदेशीर साठा करत असल्याने इंधन टंचाईची तीव्रता अधिकच वाढली आहे.
पूर्वी इंधन टंचाईच्या काळात जिल्हाधिकाऱ्यांनी कॅन किंवा ड्रम मध्ये पेट्रोल डिझेल देण्यावर पूर्णपणे बंदी घातली होती मात्र सध्या शेतीची मशागतीची कामे सुरू असल्याने प्रत्येक वेळी अवाढव्य ट्रॅक्टर पंपावर आणणे शक्य होत नाही हाच व्यावहारिक दृष्टिकोन समोर ठेवून प्रशासनाने शेतकऱ्यांना कॅन मध्ये डिझेल देण्यास विशेष मुभा दिली आहे. याच सवलतीचा गैरफायदा घेत आता साठेबाज सक्रिय झाले आहेत. पंपावर सध्या वाहनापेक्षा हातामध्ये कॅन घेऊन उभ्या असलेल्या लोकांच्या मोठ्या रांगा दिसत आहे.
