कमला एकादशी निमित्त असोला तर्फे औंढा नागनाथ येथे भव्य दिंडी मिरवणूक

औंढा नागनाथ प्रतिनिधी

आज बुधवार रोजी पवित्र कमला एकादशी निमित्त असोला गावाच्या वतीने औंढा नागनाथ येथे भव्य दिंडी मिरवणूक मोठ्या उत्साहात व भक्तिमय वातावरणात काढण्यात आली. “विठ्ठल विठ्ठल जय हरी विठ्ठल” च्या अखंड गजरात भाविकांनी दिंडीत उत्स्फूर्त सहभाग नोंदविला.

या दिंडी मिरवणुकीत गावातील सर्व भजनी मंडळी, वारकरी, महिला, युवक तसेच समस्त ग्रामस्थ मोठ्या संख्येने सहभागी झाले होते. टाळ-मृदुंगाच्या निनादात आणि हरिनामाच्या गजरात संपूर्ण परिसर भक्तिरसात न्हाऊन निघाला. वारकरी संप्रदायाची परंपरा जपत भक्तांनी शिस्तबद्ध पद्धतीने दिंडी काढून भक्तीभाव व्यक्त केला.

औंढा नागनाथ मंदिर परिसरात दर्शनासाठी आलेल्या भाविकांनीही या दिंडीचे उत्साहाने स्वागत केले. भक्तिमय वातावरणामुळे परिसरात अध्यात्मिक ऊर्जा निर्माण झाली होती.

यावेळी गावकऱ्यांच्या वतीने सर्वांना कमला एकादशीच्या हार्दिक शुभेच्छा देण्यात आल्या.
“सर्वांच्या जीवनात सुख, समाधान आणि समृद्धी नांदो,” अशी प्रार्थना यावेळी करण्यात आली. 💐🙏💐