“बुके नको, पुस्तक द्या” उपक्रमातून साकारला ज्ञानाचा अनोखा उपक्रम
अंबाजोगाई (प्रतिनिधी)
अंबाजोगाई “बुके नको, पुस्तक द्या” या अभिनव संकल्पनेतून अंबाजोगाई शहरात उभारण्यात आलेल्या ‘ज्ञानप्रसादालय’ या ग्रंथालयाचे उद्घाटन शनिवारी श्री. योगेश्वरी मंदिर परिसरात उत्साहपूर्ण वातावरणात संपन्न झाले. वाचन संस्कृती जपण्याचा आणि समाजात ज्ञानाचा प्रसार करण्याचा संदेश देणारा हा उपक्रम नागरिकांसाठी प्रेरणादायी ठरला आहे.
अंबाजोगाई “पुस्तकांचं गाव” या संकल्पनेला बळ देत रोटरी क्लब ऑफ अंबाजोगाई सिटी आणि श्री. योगेश्वरी देवल कमिटी यांच्या संयुक्त विद्यमाने हा उपक्रम साकारण्यात आला. मंदिर परिसरात सुरू करण्यात आलेले हे ग्रंथालय भक्तांसाठी ज्ञानाचे नवे दालन ठरणार असून धार्मिक स्थळासोबतच बौद्धिक समृद्धीचे केंद्र म्हणूनही या उपक्रमाकडे पाहिले जात आहे.
या कार्यक्रमाच्या अध्यक्षस्थानी रोटरीचे प्रांतपाल सुधीर लातुरे होते. उद्घाटक म्हणून देवल कमिटीचे सचिव गिरधारीलालजी भराडिया उपस्थित होते. यावेळी रोटरीचे उपप्रांतपाल प्रवीण देशपांडे, प्रांतसचिव डॉ. राजगोपाल तापडिया, देवल कमिटीचे विश्वस्त कमलाकर चौसाळकर, उल्हास पांडे, हंसराज देशमुख, प्रवीण दामा, पूजा कुलकर्णी, गौरी जोशी, रोटरी क्लबच्या अध्यक्षा प्रा. रोहिणी पाठक, सचिव मंजुषा जोशी, प्रकल्प प्रमुख अविनाश मुडेगावकर, सहप्रकल्प प्रमुख धनराज सोळंकी, सौ. संगीता लातुरे, शर्मिष्ठा देशपांडे आदी मान्यवर मंचावर उपस्थित होते.
यावेळी बोलताना गिरधारीलाल भराडिया म्हणाले की, “मंदिरात येणाऱ्या भक्तांना आता महाप्रसादासोबत ज्ञानप्रसादही मिळणार आहे. हे ग्रंथालय अधिक सुसज्ज आणि अत्याधुनिक करण्यात येणार असून अंबाजोगाईतील विविध पर्यटन स्थळांची माहितीही येथे उपलब्ध करून दिली जाणार आहे.”
अध्यक्षीय समारोपात सुधीर लातुरे यांनी वाचन संस्कृतीचे महत्त्व अधोरेखित केले. “वाचन संस्कृती टिकली तरच समाज प्रगतीच्या दिशेने वाटचाल करू शकतो. मंदिर परिसरात सुरू झालेला हा उपक्रम समाजासाठी प्रेरणादायी आहे,” असे ते म्हणाले. यावेळी प्रवीण देशपांडे व प्रा. रोहिणी पाठक यांनीही आपले मनोगत व्यक्त केले.
दीपप्रज्वलन आणि फित कापून ‘ज्ञानप्रसादालय’ ग्रंथालयाचे औपचारिक उद्घाटन करण्यात आले. कार्यक्रमाचे प्रास्ताविक प्रकल्प प्रमुख अविनाश मुडेगावकर यांनी केले. कार्यक्रमाचे सुत्रसंचालन सुरेखा काळे आणि शिल्पा सेलुकर यांनी केले, तर उपस्थितांचे आभार धनराज सोळंकी यांनी मानले. या कार्यक्रमास महिला, विद्यार्थी, वाचनप्रेमी आणि नागरिक मोठ्या संख्येने उपस्थित होते.
बुकेऐवजी पुस्तकांच्या भेटीतून उभे राहिले ज्ञानमंदिर
पत्रकार अविनाश मुडेगावकर यांच्या वाढदिवसानिमित्त रोटरी क्लब ऑफ अंबाजोगाई सिटीच्या पुढाकारातून “बुके नको, बुक द्या” हा उपक्रम राबविण्यात आला होता. या उपक्रमाला नागरिकांकडून उत्स्फूर्त प्रतिसाद मिळाला आणि तब्बल एक हजार पुस्तके जमा झाली. या पुस्तकसंपदेचेच रूपांतर आता ‘ज्ञानप्रसादालय’ या सुंदर आणि उपयुक्त ग्रंथालयात झाले आहे.
समाजात वाचनाची आवड निर्माण करण्यासोबतच ज्ञानदानाची परंपरा जपणारा हा उपक्रम अंबाजोगाई शहरासाठी अभिमानाची बाब ठरत असून नागरिकांकडून या उपक्रमाचे सर्वत्र कौतुक होत आहे.
