अमरावती पंचायत समिती अंतर्गत असलेल्या ग्रामपंचायत सुकळी येथील गेल्या १५ वर्षापासुन कार्यरत पाणी पुरवठा कर्मचारी श्री . सिध्दार्थ दुर्योधन गोंडाणे यांचे राहणीमान भत्त्यासह मागील वेतन ग्रामपंचायतकडे थकित होते .आपले थकित वेतन मिळावे म्हणून ते मागील दोन महिन्यांपासुन ग्रामपंचायतकडे वारंवार मागणी करत होते .परंतु थकित वेतन देण्यास ग्रामपंचायत प्रशासन जाणीवपुर्वक टाळाटाळ करत होते . म्हणून त्यांनी मा . गटविकास अधिकारी,पंचायत समिती अमरावती तसेच मा . उपमुख्य कार्यकारी अधिकारी जिल्हा परिषद अमरावती यांचेकडे धाव घेतली .पंचायत समितीने दोनदा काढलेल्या पत्राला देखील ग्रामपंचायत प्रशासन जुमानत नव्हते . आपल्याला न्याय मिळावा, वेतनाची सर्व थकित रक्कम तात्काळ मिळावी म्हणून कर्मचारी सिध्दार्थ गोंडाणे यांनी अखेर ग्रामपंचायत सुकळी यांचे विरोधात २८ मे२०२६पासुन बेमुदत उपोषण करण्याचा निर्णय घेतला .२० मे रोजी दिलेल्या उपोषणाच्या नोटीसची दखल घेत, योग्य कार्यवाही करून ग्रा.पं.कर्मचारी सिद्धार्थ गोंडाणे यांचे मागील सर्व थकित वेतन२५ मे पर्यंत अदा करण्याचे सक्त निर्देश ग्रामपंचायत सुकळी यांना देण्यात आले .
२८ मे पासुनच्या बेमुदत उपोषणाच्या नोटीसचा धसका घेत आणि मा . गटविकास अधिकारी पंचायत समिती अमरावती यांच्या आदेशाचे पालन करत राहणीमान भत्त्यासह थकित वेतनाचे रुपये ११२९२५ /- आणि जीपीएफचे रुपये २५८००/-असे एकूण १३८७२५ /- ( एक लक्ष अडतीस हजार सातशे पंचवीस रुपये ) सर्व रक्कम ग्रामपंचायतने काल दि .२५ मे२०२६ रोजी सिद्धार्थ गोंडाणे यांना चेकव्दारे अदा करण्यात आली . योग्य आणि समाधानकारक निर्णय झाल्याने सिध्दार्थ गोंडाणे यांनी आपले पंचायत समिती समोरील नियोजित २८ मे पासुनचे बेमुदत उपोषण करण्याचे स्थगित केले .
अर्थातच,पाठपुरावा आणि या सर्व प्रक्रियेत आयटकशी संलग्न महाराष्ट्र राज्य ग्रामपंचायत कर्मचारी महासंघाचे अमरावती तालुका व जिल्हा पदाधिकारी ग्रा.पं. कर्मचारी सिद्धार्थ गोंडाणे यांच्या पाठीशी खंबीरपणे उभे होते .
” नाक दाबल्या शिवाय तोंड उघडत नाही ” आणि
संघर्षाशिवाय पर्याय नाही ” हे या निमित्ताने पुन्हा सिद्ध झाले .
