अखिल भारतीय स्तरावर १६ वा क्रमांक; थोरातवाडीच्या सुपुत्राचा ऐतिहासिक मान, इंदापूर तालुक्याचा उंचावला गौरव
ग्रामस्थांकडून जल्लोषात स्वागत व भव्य सत्कार सोहळा; युवकांसमोर नवा आदर्श निर्माण
सारथी महाराष्ट्राचा प्रतिनिधी शत्रुघ्न घाडगे | इंदापूर :
इंदापूर तालुक्यातील थोरातवाडी गावचे सुपुत्र ओंकार महेश पवार यांनी केंद्रीय लोकसेवा आयोगाच्या (UPSC) परीक्षेत दैदिप्यमान यश संपादन करत अखिल भारतीय स्तरावर १६ वा क्रमांक पटकावला असून, त्यांच्या या अभूतपूर्व यशामुळे इंदापूर तालुक्याच्या शिरपेचात मानाचा तुरा रोवला गेला आहे. ओंकार पवार यांच्या यशामुळे केवळ इंदापूर तालुकाच नव्हे तर संपूर्ण पुणे जिल्हा आणि महाराष्ट्राच्या शैक्षणिक क्षेत्राचा गौरव उंचावला आहे.
ग्रामीण भागातून कठोर परिश्रम, जिद्द आणि चिकाटीच्या बळावर देशातील सर्वोच्च स्पर्धा परीक्षेत यश मिळवत ओंकार पवार यांनी युवकांसमोर प्रेरणादायी आदर्श निर्माण केला आहे. त्यांच्या यशानंतर थोरातवाडी, बेलवाडी आणि परिसरात आनंदाचे वातावरण निर्माण झाले असून ग्रामस्थांकडून अभिनंदनाचा वर्षाव होत आहे.
ओंकार पवार यांचे प्राथमिक व माध्यमिक शिक्षण वालचंदनगर येथील भारत चिल्ड्रन्स अकॅडमी येथे झाले. त्यानंतर त्यांनी अकरावी-बारावीचे शिक्षण मालोजीराजे शेतकी महाविद्यालय, फलटण येथे पूर्ण केले. पुढे पुण्यातील कृषी महाविद्यालयातून पदवी शिक्षण घेत त्यांनी UPSC सारख्या देशातील सर्वोच्च परीक्षेत उल्लेखनीय यश संपादन केले.
या यशानिमित्त बेलवाडी गावातून भव्य मिरवणुकीचे आयोजन करण्यात आले होते. तसेच थोरातवाडी येथे सार्वजनिक सत्कार समारंभ उत्साहात पार पडला. या कार्यक्रमाला विविध क्षेत्रातील मान्यवर, सामाजिक कार्यकर्ते आणि ग्रामस्थ मोठ्या संख्येने उपस्थित होते.
यावेळी भाऊसाहेब सपकाळ (माजी संचालक, श्री छत्रपती सहकारी साखर कारखाना, भवानीनगर), करणसिंह घोलप (माजी सभापती, पंचायत समिती इंदापूर), शरद जामदार (संचालक, श्री छत्रपती सहकारी साखर कारखाना, भवानीनगर), वसंतराव जगताप (ज्येष्ठ नेते, राष्ट्रवादी काँग्रेस पक्ष – अजित पवार गट, इंदापूर), शहाजी शिंदे (माजी अध्यक्ष, दूधगंगा इंदापूर), सागर भिसे, दादासाहेब थोरात व केशवराव नगरे आदी मान्यवर उपस्थित होते.
उपस्थित मान्यवरांनी आपल्या मनोगतातून ओंकार पवार यांच्या संघर्षमय प्रवासाचे कौतुक करत, त्यांची जिद्द, परिश्रम आणि ध्येयाप्रती असलेली निष्ठा युवकांसाठी प्रेरणादायी असल्याचे मत व्यक्त केले.
“ग्रामीण मातीतून देशसेवेच्या सर्वोच्च शिखरावर झेप घेणाऱ्या ओंकार पवार यांनी इंदापूरच्या युवकांसाठी नवा आदर्श निर्माण केला असून, हे यश संपूर्ण तालुक्यासाठी अभिमानास्पद आहे,” अशा भावना ग्रामस्थांकडून व्यक्त करण्यात आल्या.
