सिंधुदुर्गातील ८ पेट्रोलपंपांवर मर्यादित सेवा; ५२ पेट्रोलपंप सुरळीत सुरू
कृत्रिम टंचाई करणाऱ्यांवर कठोर कारवाईचा इशारा
कुडाळ | प्रतिनिधी
सिंधुदुर्ग जिल्ह्यात पेट्रोल आणि डिझेलचा तुटवडा निर्माण होऊ नये यासाठी जिल्हा प्रशासन सतर्क झाले असून परिस्थितीवर सातत्याने लक्ष ठेवण्यात येत आहे. जिल्ह्यातील एकूण ६० पेट्रोलपंपांपैकी ८ पेट्रोलपंपांवर इंधन उपलब्धतेसंदर्भात तात्पुरत्या अडचणी निर्माण झाल्या असल्या तरी उर्वरित ५२ पेट्रोलपंप नियमितपणे सुरू असल्याची माहिती जिल्हा पुरवठा कार्यालयाकडून देण्यात आली आहे.
प्रशासनाने दिलेल्या माहितीनुसार, ६ पेट्रोलपंपांवर पेट्रोल आणि डिझेल या दोन्ही इंधनांचा तात्पुरता तुटवडा निर्माण झाला आहे. तर उर्वरित २ पेट्रोलपंपांपैकी एका पंपावर फक्त पेट्रोल उपलब्ध असून डिझेल उपलब्ध नाही, तर दुसऱ्या पंपावर डिझेल उपलब्ध असून पेट्रोलचा साठा संपल्याचे स्पष्ट करण्यात आले आहे.
संबंधित कंपन्यांच्या विक्री प्रतिनिधी व डेपो व्यवस्थापकांनी माहिती देताना सांगितले की, ड्राय झालेल्या पेट्रोलपंपांसाठी टँकर लोड करण्यात आले असून उद्यापर्यंत परिस्थिती पूर्ववत होण्याची शक्यता आहे. त्यामुळे नागरिकांनी घाबरून जाण्याचे किंवा अतिरिक्त इंधन साठवण्याचे कारण नसल्याचे प्रशासनाने स्पष्ट केले आहे.
दरम्यान, जिल्ह्यातील बहुतांश पेट्रोलपंप सुरळीत सुरू असून संबंधित कंपन्यांच्या पुरवठ्यानुसार आणि डेपोमधील मागणीनुसार इंधन वितरण नियमितपणे सुरू असल्याचेही प्रशासनाने सांगितले. नागरिकांनी कोणत्याही अफवांवर विश्वास ठेवू नये आणि विनाकारण गर्दी करू नये, असे आवाहन करण्यात आले आहे.
सिंधुदुर्ग जिल्ह्यात पेट्रोल-डिझेलची कृत्रिम टंचाई निर्माण होऊ नये यासाठी प्रशासनाने HPCL, IndianOil आणि Bharat Petroleum या कंपन्यांच्या डेपो व्यवस्थापक व विक्री प्रतिनिधींशी सातत्याने संपर्क ठेवला आहे.
याशिवाय, कृत्रिम दरवाढ, साठेबाजी किंवा इंधनाचा काळाबाजार रोखण्यासाठी तालुकास्तरावर भरारी पथके सक्रिय करण्यात आली आहेत. पेट्रोलपंपांची तपासणी आणि छापेमारीचे आदेश देण्यात आले असून, कोणत्याही प्रकारचा गैरप्रकार आढळल्यास संबंधितांविरोधात कठोर कारवाई करण्यात येणार असल्याचा इशारा प्रशासनाने दिला आहे.
