उरण | प्रतिनिधी | श्रीनाथ दत्तात्रेय लाड
Jawaharlal Nehru Port Authority (JNPA) उरण येथील न्हावा शेवा बंदरात काम करणाऱ्या सर्व कंटेनर वाहतूकदार संघटनांनी २८ मेपासून ‘काम बंद’ आंदोलनाचा इशारा दिला आहे. कंटेनर यार्डवर आकारण्यात येणाऱ्या जाचक शुल्काच्या निषेधार्थ हा निर्णय घेण्यात आला असून, या आंदोलनामुळे बंदरातील मालवाहतूक ठप्प होऊन देशाच्या आयात-निर्यात व्यवहाराला मोठा फटका बसण्याची शक्यता व्यक्त केली जात आहे.
मिळालेल्या माहितीनुसार, गेल्या काही दिवसांपासून रिकाम्या कंटेनरच्या पिक-अप आणि ड्रॉप-ऑफसाठी रिकाम्या कंटेनर यार्ड्सकडून (Empty Container Yards) अवाजवी शुल्क आकारले जात आहे. विशेषतः अतिरिक्त LOLO शुल्कामुळे कंटेनर वाहतूकदारांमध्ये तीव्र नाराजी निर्माण झाली आहे.
या शुल्काविरोधात वाहतूकदार संघटनांनी संबंधित प्राधिकरणांकडे वारंवार तक्रारी केल्या होत्या. मात्र कोणतीही ठोस उपाययोजना न झाल्याने अखेर न्हावा शेवा कंटेनर ऑपरेशन असोसिएशनने कोणत्याही प्रकारचे अतिरिक्त शुल्क न भरण्याचा आणि २८ मेपासून स्वेच्छेने काम बंद करण्याचा निर्णय घेतला आहे.
दरम्यान, पंतप्रधान गतिशक्ती योजनेअंतर्गत सुरू असलेल्या कामांमुळे तसेच जागतिक स्तरावरील विविध घडामोडींमुळे जेएनपीए बंदरात आधीच कंटेनरची मोठ्या प्रमाणात कोंडी झाली आहे. अशा परिस्थितीत आता वाहतूकदारांच्या संपामुळे आयात आणि निर्यातीचे कंटेनर्स जागेवरच अडकून पडण्याची शक्यता निर्माण झाली आहे.
या आंदोलनाचा थेट परिणाम व्यापारी, आयातदार आणि निर्यातदारांवर होणार असून माल वितरणात विलंब, अतिरिक्त खर्च आणि आर्थिक नुकसान सहन करावे लागू शकते. बंदराशी संबंधित लॉजिस्टिक साखळीवरही याचा मोठा परिणाम होण्याची भीती व्यक्त केली जात आहे.
विशेष म्हणजे, कंटेनर चालकांच्या टंचाईमुळे निर्माण झालेल्या अडचणींवर मात करण्यासाठी जेएनपीए प्रशासनाकडून युद्धपातळीवर उपाययोजना सुरू होत्या. मात्र, आता नव्याने समोर आलेल्या आंदोलनामुळे प्रशासनासमोरील आव्हाने आणखी वाढली आहेत.
सध्या जेएनपीए प्रशासन आणि कंटेनर वाहतूकदार संघटना यांच्यात चर्चेची शक्यता व्यक्त होत असून, आंदोलनापूर्वी तोडगा निघतो का याकडे संपूर्ण व्यापारी आणि उद्योग क्षेत्राचे लक्ष लागले आहे.
