दुघळा | प्रतिनिधी
दुघळा येथील गरीब कुटुंबातील अभ्यासू विद्यार्थी सय्यद मोबीन सय्यद वजीर यांनी अवघ्या १९ व्या वर्षी मोठे यश संपादन करत मुंबई शहर पोलीस पदासाठी निवड मिळवली आहे. विशेष म्हणजे पहिल्याच प्रयत्नात त्यांनी हे यश मिळविल्याने संपूर्ण गावातून त्यांचे कौतुक होत असून गावात आनंदाचे वातावरण निर्माण झाले आहे.
अत्यंत प्रतिकूल परिस्थितीत शिक्षण घेत मेहनत, जिद्द आणि चिकाटीच्या जोरावर सय्यद मोबीन यांनी हे यश मिळवले. त्यांच्या या यशामुळे गावातील युवकांमध्ये प्रेरणा निर्माण झाली असून “मेहनत केली तर यश नक्की मिळते” याचे जिवंत उदाहरण म्हणून त्यांच्याकडे पाहिले जात आहे.
सय्यद मोबीन यांच्या निवडीची बातमी गावात समजताच मित्रपरिवार, नातेवाईक आणि ग्रामस्थांनी त्यांच्यावर अभिनंदनाचा वर्षाव केला. घरातही आनंदाचे आणि उत्साहाचे वातावरण पाहायला मिळाले. आई-वडील, आजोबा तसेच कुटुंबीयांनी त्यांचे विशेष कौतुक करत आनंद व्यक्त केला.
गावातील नागरिकांनी सांगितले की, “गरीब परिस्थितीतून पुढे येत मोबीनने केलेले यश संपादन हे संपूर्ण गावासाठी अभिमानाची बाब आहे.” अनेकांनी त्यांच्या पुढील उज्ज्वल भविष्यासाठी शुभेच्छा दिल्या.
मोबीन यांच्या यशामुळे दुघळा गावात सध्या सर्वत्र त्यांच्या कामगिरीची चर्चा सुरू असून युवकांमध्ये नवचैतन्य निर्माण झाले आहे.
