पिंपरी चिंचवड | प्रतिनिधी
आंबेठाण परिसरातील रस्ता दुरुस्ती आणि खड्डे बुजविण्याच्या कामासाठी पिंपरी चिंचवड वाहतूक शाखेकडून तात्पुरती वाहतूक नियंत्रण अधिसूचना जारी करण्यात आली आहे. आंबेठाण येथील सा.क्र. ४/४७० ते ४/५७० या सुमारे १०० मीटर लांबीच्या भागात कॉंक्रिटीकरणाचे काम करण्यात येणार असल्याने वाहतूक वळविण्याचा निर्णय घेण्यात आला आहे.
मिळालेल्या माहितीनुसार, आंबेठाण हनुमान मंदिराच्या मागील रस्त्यावर वासुली फाटा ते बिरदवाडी फाटा दरम्यान मोठ्या प्रमाणात खड्डे पडले असून त्यामुळे वाहतूक कोंडी आणि अपघात होण्याची शक्यता निर्माण झाली होती. स्थानिक नागरिक तसेच लोकप्रतिनिधींकडून सातत्याने तक्रारी प्राप्त झाल्यानंतर प्रशासनाने ही कारवाई केली आहे.
संदिप आटोळे यांनी मोटार वाहन कायदा कलम ११५, ११६ आणि ११७ अन्वये प्राप्त अधिकारांचा वापर करून तात्पुरते आदेश निर्गमित केले आहेत.
या मार्गावरील वाहतुकीस बंदी
महाळुंगे-चाकण वाहतूक विभागांतर्गत आंबेठाण हनुमान मंदिराच्या मागील रस्त्यावर वासुली फाटा ते बिरदवाडी फाटा दरम्यान सर्व प्रकारच्या वाहनांच्या वाहतुकीस तात्पुरती मनाई करण्यात आली आहे.
पर्यायी मार्ग
- तळेगाव बाजूकडून येणारी वाहने वासुली फाटा मार्गे एच.पी. चौकातून इच्छितस्थळी जातील.
- भारत पेट्रोल पंप शेजारील चौक मार्गे महाळुंगे गाव वाय पॉईंटमार्गे वाहतूक वळविण्यात येईल.
- आंबेगाव ते महाळुंगे गाव वाय पॉईंटमार्गे पर्यायी मार्ग उपलब्ध राहील.
- चाकण/खेड बाजूकडून येणारी वाहने बिरदवाडी चौक मार्गे महाळुंगे गाव वाय पॉईंटमार्गे जातील.
- काही वाहने बिरदवाडी चौक मार्गे चावडी चौकातून इच्छितस्थळी जाऊ शकतील.
जड वाहनांनाही बंदी
पुणे-नाशिक महामार्गावरील भाम फाटा आणि आंबेठाण चौक येथून बिरदवाडी फाट्याकडे जाणाऱ्या सर्व प्रकारच्या जड व अवजड वाहनांना बंदी घालण्यात आली आहे.
या वाहनांसाठी पुणे-नाशिक महामार्गावरील चाकण-तळेगाव चौकमार्गे पर्यायी मार्ग निश्चित करण्यात आला आहे.
ही वाहतूक अधिसूचना दि. २८ मे २०२६ रोजी रात्री ९ वाजल्यापासून ते २९ मे २०२६ रोजी रात्री १२ वाजेपर्यंत लागू राहणार असून वाहनचालकांनी प्रशासनाला सहकार्य करत पर्यायी मार्गांचा वापर करावा, असे आवाहन वाहतूक शाखेकडून करण्यात आले आहे.
