जिवती / ता. प्रतिनिधी
जिवती तालुक्यात शनिवारी दुपारी अचानक आलेल्या अवकाळी पावसाने जनजीवन विस्कळीत झाले. दुपारी सुमारे तीन वाजण्याच्या सुमारास जोरदार वाऱ्यासह पावसाने हजेरी लावल्याने सेनगाव ते नंदपा या मुख्य मार्गावर अनेक ठिकाणी मोठी झाडे रस्त्यावर कोसळली. त्यामुळे या मार्गावरील वाहतुकीला मोठा अडथळा निर्माण झाला असून वाहनचालकांना मोठ्या गैरसोयीचा सामना करावा लागत आहे.
अचानक आलेल्या वादळी पावसामुळे परिसरात काही काळ भीतीचे वातावरण निर्माण झाले होते. जोरदार वाऱ्यामुळे रस्त्यालगतची जुनी व मोठी झाडे उन्मळून पडली. काही ठिकाणी झाडांच्या फांद्या वीजवाहिन्यांवर पडल्याने विद्युत पुरवठाही खंडित झाल्याची माहिती स्थानिक नागरिकांनी दिली.
सेनगाव – नंदपा हा मार्ग ग्रामीण भागातील नागरिकांसाठी अत्यंत महत्त्वाचा समजला जातो. या मार्गावरून दररोज शेतकरी, विद्यार्थी तसेच व्यापारी मोठ्या प्रमाणात प्रवास करतात. मात्र झाडे कोसळल्याने काही काळ वाहतूक पूर्णपणे ठप्प झाली होती. दुचाकीस्वार, चारचाकी वाहनधारक तसेच मालवाहू वाहनांना रस्त्यातच थांबावे लागले. काही वाहनचालकांनी पर्यायी मार्गांचा वापर करण्याचा प्रयत्न केला, मात्र ग्रामीण भागातील रस्त्यांची अवस्था खराब असल्याने त्यांनाही अडचणींचा सामना करावा लागला.
घटनेची माहिती मिळताच स्थानिक ग्रामस्थांनी तत्काळ घटनास्थळी धाव घेतली. नागरिकांनी स्वतः पुढाकार घेत झाडांच्या फांद्या बाजूला करण्याचा प्रयत्न केला. त्यानंतर संबंधित प्रशासन व वन विभागाला माहिती देण्यात आली. प्रशासनाच्या पथकाने घटनास्थळी पोहोचून झाडे हटविण्याचे काम सुरू केले.
अवकाळी पावसामुळे शेतकऱ्यांचीही चिंता वाढली असून काही ठिकाणी उभ्या पिकांचे नुकसान झाल्याची प्राथमिक माहिती समोर येत आहे. मागील काही दिवसांपासून वाढत्या उकाड्यानंतर अचानक बदललेल्या हवामानामुळे नागरिकांमध्ये संभ्रमाचे वातावरण आहे.
दरम्यान, नागरिकांनी पावसाळ्याच्या पार्श्वभूमीवर रस्त्यालगत धोकादायक स्थितीत असलेल्या झाडांची तपासणी करून योग्य ती उपाययोजना करण्याची मागणी प्रशासनाकडे केली आहे. तसेच अशा आपत्कालीन परिस्थितीत तात्काळ मदत पोहोचण्यासाठी यंत्रणा अधिक सज्ज ठेवावी, अशी अपेक्षाही व्यक्त होत आहे.
