कायदा व सुव्यवस्था अबाधित ठेवण्यासाठी पोलिस प्रशासन सतर्क
कळमनुरी / सतीश पंडित
बकरी ईद सणाच्या पार्श्वभूमीवर कळमनुरी शहरात कायदा व सुव्यवस्था अबाधित राहावी तसेच नागरिकांमध्ये सुरक्षिततेची भावना निर्माण व्हावी, या उद्देशाने कळमनुरी पोलिसांच्या वतीने भव्य पथसंचलनाचे आयोजन करण्यात आले होते.
पोलीस अधीक्षक हिंगोली डॉ. निलाभ रोहन यांच्या मार्गदर्शनाखाली कळमनुरी पोलीस स्टेशनचे वरिष्ठ पोलीस निरीक्षक श्री. प्रेमकुमार माकोडे यांनी दि. २७ मे २०२६ रोजी सायंकाळी पाच वाजण्याच्या सुमारास शहरातील मुख्य मिरवणूक मार्गावर या पथसंचलनाचे नेतृत्व केले.
या पथसंचलनाद्वारे पोलिस प्रशासनाकडून शांतता, सलोखा आणि सामाजिक ऐक्याचा संदेश देण्यात आला. शहरातील विविध भागातून कडक पोलिस बंदोबस्तात हे संचलन पार पडले. पोलिस दलाच्या शिस्तबद्ध मार्चमुळे नागरिकांमध्ये विश्वासाचे वातावरण निर्माण झाले असून सण उत्साहात आणि शांततेत साजरा करण्याचे आवाहन प्रशासनाच्या वतीने करण्यात आले.
सदर पथसंचलनामध्ये पोलीस उपनिरीक्षक श्री. इंगळे, पोलीस उपनिरीक्षक श्री. ठेंगे यांच्यासह स्थानिक पोलीस स्टेशनचे अधिकारी व कर्मचारी मोठ्या संख्येने सहभागी झाले होते. तसेच एक एसआरपीएफ तुकडी, गृह रक्षक दलाचे तब्बल ४० पुरुष कर्मचारी आणि १५ महिला कर्मचारी यांचाही सहभाग होता.
शहरातील संवेदनशील भाग, मुख्य चौक तसेच गर्दीच्या परिसरातून हे संचलन काढण्यात आले. नागरिकांनीही पोलिसांच्या या उपक्रमाचे स्वागत करत प्रशासनाच्या तयारीबद्दल समाधान व्यक्त केले.
दरम्यान, हे पथसंचलन यशस्वी करण्यासाठी गोपनीय शाखेचे श्री. होळकर यांनी विशेष परिश्रम घेतले. पोलिस प्रशासनाने नागरिकांना अफवांवर विश्वास न ठेवता शांतता आणि सामाजिक सलोखा कायम राखण्याचे आवाहन केले आहे.
