जडगाव / प्रतिनिधी
जडगाव येथे ईद-उल-अजहा (बकरी ईद) मोठ्या उत्साहात आणि शांततापूर्ण वातावरणात साजरी करण्यात आली. सकाळी ठीक ८.३० वाजता ईदगाह मैदानावर ईदची विशेष नमाज अदा करण्यात आली. गावातील मुस्लिम बांधवांसह ज्येष्ठ नागरिक, नवतरुण मंडळी तसेच विविध समाजातील नागरिक मोठ्या संख्येने उपस्थित होते.
यावेळी नमाज पठण इमाम तुराब खाँ पठाण यांनी केले. नमाजानंतर त्यांनी उपस्थितांना ईद-उल-अजहाचे धार्मिक महत्त्व समजावून सांगत कुर्बानीचे महत्त्व, त्याग, बंधुभाव आणि मानवतेचा संदेश दिला. समाजात शांतता, सौहार्द आणि एकोपा टिकवून ठेवण्याचे आवाहनही त्यांनी केले.
सणाच्या पार्श्वभूमीवर कायदा व सुव्यवस्था अबाधित राहावी यासाठी पोलिस प्रशासनही सतर्क होते. औंढा येथील पोलीस जमादार किशोर परिस्कर, पोलिस निरीक्षक पी. एस. पडोळे तसेच जडगावचे पोलिस पाटील आनंद पाटील पडोळे यांनी उपस्थित राहून बंदोबस्ताची पाहणी केली.
नमाज पूर्ण झाल्यानंतर उपस्थित मुस्लिम बांधवांनी एकमेकांना गळाभेट देत ईदच्या शुभेच्छा दिल्या. संपूर्ण परिसरात आनंद, उत्साह आणि बंधुभावाचे वातावरण पाहायला मिळाले. गावात ईदचा सण अत्यंत शांततेत आणि सामाजिक सलोखा जपत पार पडल्याने नागरिकांनी समाधान व्यक्त केले.
